Jetisý oblysynda ArtSport baǵdarlamasyna bólingen 830 mln teńge Ulttyq qorǵa qaıtaryldy
Óńirde bıýdjet qarjysyn tıimdi paıdalaný maqsatynda jasalǵan jumystyń nátıjesinde ArtSport baǵdarlamasyna bólingen qarjy qaıta qaralyp, 830 mln teńge únemdeldi. Qarajat Ulttyq qorǵa qaıtaryldy, dep habarlaıdy Kazinform.
Bıyl óńirdiń mádenıet salasyn damytýǵa 11 mlrd 694 mln teńge bólingen. Bul qatarda balalardyń bos ýaqytyn tıimdi paıdalaný maqsatynda ashylǵan mektepten tys úıirmelerdiń qyzmetin qoldaýǵa bólingen qarjy da bar.
Buǵan deıin aımaqta ArtSport baǵdarlamasy boıynsha aqsha tóleý júıesi jıi synǵa ushyraǵan edi.
Qadaǵalaý men túsindirý jumystarynan keıin jeke kásipkerler bıýdjetten tólenetin qarjyny únemdeýdiń tıimdi ádisine kóshken.
Qazir oblys aýmaǵynda balalar shyǵarmashylyǵyn damytý ortalyqtary men sport úıirmeleri biryńǵaı elektrondy júıe boıynsha qyzmet kórsetedi.
Bul óz kezeginde bala sanyn naqtylap, úıirmege qatyspaıtyndar úshin de aqsha alyp otyrýdyń jolyn kesýge múmkindik bergen.
Jalpy, aımaqta mádenıet basqarmasyna qarasty 309 nysan bar. Oǵan mádenıet úıleri men arhıv mekemeleri kiredi. Bul nysandardyń kópshiligi kúrdeli jóndeýdi qajet etedi eken.
«Bólingen qarjy óńirdegi birqatar aýdanda mádenıet úılerin jóndeý jáne jańa qurylys jumystaryn júrgizýge jumsalyp jatyr. Búginde Aqsý aýdany Aqsý aýyly, Kerbulaq aýdany Jolaman aýyly jáne Tekeli qalalyq mádenıet úıiniń kúrdeli jóndeý jumysy máresine jetti. Al Qaratal aýdany Kálpe aýyldyq mádenıet úıi jáne Úshtóbe qalasyndaǵy tarıhı-ólketaný mýzeıin paıdalanýǵa berdik», — deıdi Jetisý oblysynyń mádenıet, arhıvter jáne qujattama basqarmasynyń basshysy Qýanysh Súleımenov.
