Jetisý oblysynda sýmen jabdyqtaý qyzmetterine tarıfter tómendetildi

ASTANA. KAZINFORM – Qabyldanǵan sharalardyń arqasynda bıznes sýbektileri shamamen 23 mln teńgeni únemdeı aldy.

2023 jyldan bastap «Bızneske jol» jobasy aıasynda memlekettik organdarmen ózara qarym-qatynas kezinde týyndaıtyn ákimshilik kedergilerdi joıýda kásipkerlerge kómek kórsetilip jatyr.

Joba iske qosylǵannan beri 49 myńnan astam kásipkerdiń quqyqtary qorǵalyp, shamamen 800 másele sheshildi.

Máselen, Sybaılas jemqorlyqqa qarsy qyzmet usynysy boıynsha Taldyqorǵan qalasynyń turǵyndary men 2,4 myń kásipkerdiń quqyqtary qorǵaldy.

- «Jetisý Sý Arnasy» sharýashylyq júrgizý quqyǵyndaǵy memlekettik kommýnaldyq kásiporyn kórsetiletin qyzmetter kóleminiń ósýine qaramastan, zańnama talap etkendeı sý tarıfin tómendetpegen. «Bızneske jol» jobasy sheńberinde sýǵa negizsiz tarıfti tómendetýge qol jetkizildi, bul jeke tulǵalar men kásipkerlik sýbektilerine de áser etti (bıznes sýbektileri úshin tarıf 275,5 teńgeden 251 teńgege deıin – 1 m3 úshin, jeke tulǵalarǵa 1 m3 úshin – 70 teńgeden 68 teńgege deıin tómendetildi), - delingen Antıkor habarlamasynda. 

Qabyldanǵan sharalardyń arqasynda bıznes sýbektileri shamamen 23 mln teńgeni únemdeı aldy.

Budan basqa, Antıkor Jetisýdyń usynysy boıynsha tehnıkalyq sharttardy kózdelmegen qyzmettermen mindetti túrde kelisýge baılanysty ákimshilik kedergiler joıyldy, bul bekitilgen úlgilik nysandarǵa qaıshy keldi.

- Sondaı-aq monopolııaǵa qarsy vedomstvo tarapynan tehnıkalyq sharttardy berýden bas tartýdyń zańdylyǵyna tekserý júrgizildi. Nátıjesinde zańsyz bas tartý tájirıbesin toqtatyp, «Jetisý Sý Arnasy» sharýashylyq júrgizý quqyǵyndaǵy memlekettik kommýnaldyq kásiporynǵa 15,5 mln teńge kóleminde aıyppul salyndy, - delingen habarlamada.

Qabyldanǵan sharalar ádil tarıftik saıasatty qalyptastyrýǵa jáne jergilikti turǵyndar men bıznes sýbektileri úshin qolaıly jaǵdaılar jasaýǵa múmkindik berdi