Jetisý oblysynda alty adam 61 bas iri qara urlaǵany úshin sottaldy
ASTANA. KAZINFORM — Jetisý oblysynda iri qara mal urlyǵynyń birneshe deregi boıynsha qozǵalǵan qylmystyq isti tergeý aıaqtaldy.
Sot talqylaýynyń qorytyndysy boıynsha Sarqan aýdanynyń alty turǵyny 61 bas iri qara mal urlaǵany úshin kináli dep tanyldy.
Mal ıelerine keltirilgen jalpy shyǵyn kólemi — 28,8 mln teńge.
Polıtsııanyń málimetinshe, tergeý barysynda kúdiktilerdiń aldyn ala sóz baılasý arqyly áreket etkeni anyqtaldy. Olar urlanǵan maldy Alakól aýdanynyń aýmaǵynan Sarqan aýdanyna aıdap áketken. Janýarlardyń bir bóligi keıinnen soıylyp, etin satýdy josparlaǵan.
Polıtsııa qyzmetkerleri júrgizgen jedel-tergeý is-sharalarynyń nátıjesinde qylmystarǵa qatysy bar barlyq tulǵalardyń árqaısysynyń róli anyqtaldy.
— Tergeý amaldary Jetisý oblysynyń prokýratýrasymen birlesip júrgizildi. Jınalǵan dáleldemeler qylmystardyń mán-jaılaryn jáne árbir fıgýranttyń áreketin tolyq anyqtaýǵa múmkindik berdi. Sot úkimimen alty sottalýshynyń barlyǵy kináli dep tanylyp, 2 jyldan 5 jylǵa deıingi merzimge bas bostandyǵynan aıyryldy, — delingen habarlamada.
Eske salaıyq, buǵan deıin Almatyda 50-ge jýyq urlyq jasaǵan alty qylmystyq top ustalǵanyn habarlaǵanbyz.
