Jetisý oblysynda alaıaqtyqqa qatysty qylmys 33%-ǵa tómendegen
ASTANA. KAZINFORM — Jetisý oblysynyń prokýrory Baýyrjan Jumaqanovtyń tóraǵalyǵymen alaıaqtyqqa, onyń ishinde ınternet-alaıaqtyq pen kıberqylmysqa qarsy is-qımyl salasyndaǵy zańdylyqtyń jaı-kúıi máseleleri boıynsha alqa otyrysy ótti.
Otyrysqa ishki ister jáne ekonomıkalyq tergep-tekserý organdarynyń basshylyǵy, oblys ákimdiginiń ókilderi, sondaı-aq tsıfrlandyrý, qarjylyq retteý jáne bank sektory salasyndaǵy ýákiletti organdardyń ókilderi qatysty.
Oblys prokýrory Memleket Basshysynyń kıberqaýipsizdikti qamtamasyz etý jáne azamattardyń múliktik quqyqtaryn qorǵaý jónindegi tapsyrmalaryn iske asyrýdyń mańyzdylyǵyn atap ótti. Alqa barysynda ınternet-alaıaqtyq pen kıberqylmysqa baılanysty qylmys jasaýdyń jańa tásilderine jedel den qoıý tetikteri qaraldy.
Sonymen qatar oblys prokýratýrasy ınternet-alaıaqtyqty anyqtaý men jolyn kesý, quqyq qorǵaý organdarynyń qyzmetin úılestirý jáne halyqtyń qorǵalý deńgeıin arttyrý boıynsha turaqty negizde jumys júrgizip jatqany atap ótildi.
— Ýákiletti organdarmen birlesip «Kıber-erikti» jobasy iske asyrylyp jatyr, onyń sheńberinde «Kıberbaqylaý» júıesi arqyly 46 alaıaqtyq saıt buǵattalyp, «Drop» atty profılaktıkalyq fılm shyǵaryldy. Bul sharalar osy sanattaǵy qylmystardyń tirkelýin 33%-ǵa tómendetýge, sondaı-aq «droppovodtar» tobyn anyqtaýǵa jáne ózge de buzýshylyqtar boıynsha sharalar qoldanýǵa múmkindik berdi, — delingen oblystyq prokýratýra habarlamasynda.
Otyrys barysynda alaıaqtyq kontentti jedel buǵattaý jáne ınternet-alaıaqtyqtyń aldyn alý úshin ınternet-keńistik monıtorıngin kúsheıtýdi, sondaı-aq shalǵaıdaǵy aýyldyq eldi mekenderdiń turǵyndaryn qamtı otyryp, profılaktıkalyq jumystardy keńeıtýdi qosa alǵanda, qorǵaýdyń aldyn alý tetikterin engizýge nazar aýdaryldy. Qaýipsizdiktiń jańa strategııasy sheńberinde ekinshi deńgeıdegi banktermen jedel ózara is-qımyl jasaý algorıtmi qurylýda, bul naqty ýaqyt rejıminde kúdikti tranzaktsııalardyń jolyn kesýge jáne halyqtyń qarjylyq aktıvteriniń saqtalýyn qamtamasyz etýge múmkindik beredi.
Alqa otyrysyn qorytyndylaı kele, oblys prokýrory sotqa deıingi tergep-tekserý sapasyn arttyrý, onyń ishinde ınternet-alaıaqtyq pen kıberqylmysqa baılanysty ister boıynsha jáne jazanyń bultartpastyǵy qaǵıdatyn qamtamasyz etý boıynsha birqatar naqty mindetter belgiledi.
Otyrys qorytyndysy boıynsha kıberqylmysqa qarsy is-qımyl salasyndaǵy vedomstvolyq baqylaýdy jetildirýge jáne zardap shekken azamattarǵa keltirilgen shyǵyndy óteýge baılanysty máselelerdi qaraýǵa baǵyttalǵan sharalar kesheni ázirlendi.
Osyǵan deıin BQO-da alaıaqtyq saldarynan turǵyndarǵa 2 mlrd astam teńge zalal keltirilgenin jazǵanbyz.
