Jetisý oblysynda AITV ınfektsııasyn juqtyrǵan 714 adam anyqtaldy
Óńirde taǵy bir juqpaly dert - adamnyń ımmýn tapshylyǵy vırýsynyń taralýy azaımaı otyr. Dárigerlerdiń deregi boıynsha ótken 10 aıda 714 adamnan ınfektsııa tabylǵan, dep habarlaıdy Kazinform.
AITV ınfektsııasyn juqtyrǵan adam erte kezeńnen emdelse, onyń densaýlyqqa keltiretin zııany da kemı túsedi. Juqpaly dert belgisin anyqtaýdyń birden bir joly jedel-synama tapsyrý eken.
- Ekspress-test adam bıomaterıal tapsyrǵannan soń 20-30 mınýt arasynda aǵzada AITV ınfektsııasynyń bar-joǵyn anyqtaı alady. Eger bundaı taldaý syrqat bar ekenin bildirse, dıagnozdy naqtylaý úshin nátıjeni múmkindiginshe tezirek arnaıy ortalyqtyń zerthanasynda qaıta tekserý qajet, - deıdi Jetisý oblystyq densaýlyq saqtaý basqarmasy alǵashqy kómekti úılestirý jáne qoǵamdyq densaýlyq bóliminiń basshysy Almagúl Kenjeǵulova.
Mamannyń aıtýynsha, AITV ınfektsııasy ólimge ákeletin aýrý emes. Vırýs juqtyrǵan naýqas antıretrovırýstyq terapııany úzdiksiz qoldanýdyń nátıjesinde uzaq ári sapaly ómir súredi. Sondaı-aq adam óziniń dıagnozyn erterek bilip, ART terapııasyn qabyldasa vırýstyń ózgelerge juǵýyna jol bermeıdi eken.
