Jetisý oblysynda 7,5 myńnan astam onkologııalyq naýqas esepte tur
TALDYQORǴAN. KAZINFORM — Jetisý oblysynda onkologııalyq aýrýlar boıynsha dıspanserlik esepte 7 775 adam tirkelgen. Bul týraly Taldyqorǵan qalasyndaǵy oblystyq kópbeıindi aýrýhananyń sapany baqylaý jónindegi dırektorynyń orynbasary Baýyrjan Bertaev málimdedi.
Atalǵan medıtsınalyq mekeme óńirdegi shamamen 700 myń turǵynǵa qyzmet kórsetedi jáne oblysta mamandandyrylǵan onkologııalyq kómek kórsetetin jetekshi medıtsınalyq uıym sanalady. Baýyrjan Bertaevtyń aıtýynsha, qazirgi tańda naýqastardyń 65 paıyzy dıagnoz qoıylǵannan keıin bes jyldan astam ýaqyt ómir súrip keledi. Bul erte dıagnostıka men zamanaýı emdeý ádisteriniń nátıjeli ekenin kórsetedi.
— Dıagnoz qoıylǵannan keıin bes jyl jáne odan da kóp ýaqyt ómir súrip jatqan patsıentterdiń úlesiniń artýy óńirdegi onkologııalyq kómektiń sapalyq turǵyda jańa deńgeıge kóterilgenin bildiredi. Biz erte anyqtaýǵa jáne der kezinde emdeýge basymdyq berip otyrmyz, — dedi Baýyrjan Bertaev.
Ótken jyly dıspanserlik esepke onkologııalyq aýrýlardyń 1 407 jańa jaǵdaıy alyndy. Onyń ishinde 934 jaǵdaı nemese 67 paıyzy aýrýdyń erte satysynda anyqtalǵan. Al skrınıngtik baǵdarlamalar aıasynda 143 jaǵdaı tirkelgen.
Dıagnostıkanyń qoljetimdiligin arttyrý maqsatynda oblystyń ortalyq aýdandyq aýrýhanalaryna tsıfrlyq mammograftar, sondaı-aq bir jyljymaly mammograf bólindi. Bul, ásirese, aýyldyq jáne shalǵaı eldi mekenderdiń turǵyndary úshin asa mańyzdy.
Sonymen qatar spıker ótken jyly klınıkaǵa 70-ten astam zamanaýı medıtsınalyq jabdyq alynǵanyn atap ótti. Medıtsınalyq kómektiń sapasyn arttyrý úshin 20 tósek-orynǵa arnalǵan kúndizgi statsıonardyń modýldik korpýsy salyndy.
Klınıkada dárilik zattardyń sapasyn baqylaýdy, saqtalýyn jáne utymdy qoldanylýyn qamtamasyz etetin gospıtaldyq farmatsııa bólimshesi ashyldy. Bul bólimsheniń jumysy emdeý qaýipsizdigin arttyrýǵa jáne patsıentterdi qajetti dári-dármekpen úzdiksiz qamtamasyz etýge baǵyttalǵan.
Budan bólek, bıylǵy jyldyń aqpan aıynda oblystyq kópbeıindi aýrýhana ár senbi saıyn ashyq esik kúnderin ótkizýdi qolǵa aldy. Bul kúni óńir turǵyndary tegin tekserýden ótip, mamandardan keńes ala alady, al onkologııalyq aýrýǵa kúdik bolǵan jaǵdaıda qosymsha dıagnostıkadan jedel túrde óte alady. Baýyrjan Bertaevtyń aıtýynsha, bul qajetti tekserýden áldeqaıda jyldam ótýge tamasha múmkindik.
Buǵan deıin qazaqstandyq onkologter obyrdy adaptıvti terapııamen emdeý úshin JI engizgeni habarlanǵan.
Al 2024 jyly Almatyda álem onkologtary bas qosty.