Jetisý oblysynda 72,5 mln teńgeniń gaz qubyryn urlaǵan kúdiktiler ustaldy
TALDYQORǴAN. KAZINFORM – Jetisý oblysy Aqsý aýdanynda 72,5 mln teńgeniń gaz qubyryn urlaǵan kúdiktiler ustaldy. Bul týraly Polisia.kz jazdy.
Qoldy bolǵan qubyrlarǵa qatysty polıtsııaǵa «Trans Azııa Konstrakshn» JShS dırektory aryz jazǵan. Onyń aıtýynsha, belgisiz adamdar Almaty-Óskemen tas jolynyń Qyzylaǵash jáne Jansúgirov aýyldarynyń arasyndaǵy ýchaskesinde ornatylyp jatqan quny 72 mln teńgeden asatyn 27 birlik gaz qubyryn urlap ketken.
— Jetisý oblysy polıtsııa qyzmetkerleriniń jedel is-qımyldary nátıjesinde Almaty oblysynyń úsh azamaty quryqtaldy. Kúdiktilerdiń barlyǵy qamaýǵa alyndy, olarǵa qatysty sotqa deıingi tergeý júrgizilýde, - delingen habarlamada.
Aıta keteıik magıstraldyq gaz qubyrynyń qurylysy «Taldyqorǵan-Úsharal» tas jolynda júrgizilýde. Qurylys osy jyldyń tamyz aıynda Premer-Mınıstr Oljas Bektenovtiń Jetisý oblysyna jasaǵan jumys sapary kezinde bastalǵan bolatyn. Aýqymdy joba 2025 jyldyń sońyna deıin 124 myń turǵyny bar Aqsý, Sarqan, Alakól aýdandarynyń 66 eldi mekenin tabıǵı gazben qamtamasyz etý úshin qolǵa alynǵan edi. Eske salaıyq osyǵan deıin Jetisýda aýyl ákimderi múgedekter men kópbalaly analardyń jalaqysynan zańsyz jarna alǵanyn jazǵanbyz.