Jetisý oblysynda 62 medıtsına mekemesi sanıtarlyq talaptardy saqtamaǵan
Ádette dárigerlerdiń biliktiligi men emdeý oryndaryndaǵy qyzmet kórsetýdiń sapasyna baılanysty naýqastardyń shaǵymy jıi aıtylatyn. Endi medıtsına uıymdaryndaǵy jaǵdaıǵa tekserýshi organdardyń da kóńili tolmaı otyr. Jetisý oblysyndaǵy 62 emhana men aýrýhanaǵa tekserý júrgizgen sanıtarlyq-epıdemıologııalyq baqylaý departamenti mamandarynyń málimdesinen keıin osylaı deýge bolady, - dep habarlaıdy Kazinform tilshisi.
Emdeý oryndaǵy qarapaıym talaptardyń saqtalmaıtyndyǵyna ótken 9 aı boıyna tereń taldaý jasaǵan epıdemıolog-mamandar kóz jetkizgen.
- Jetisý oblysy boıynsha sanıtarlyq-epıdemıologııalyq baqylaý departamenti 62 medıtsınalyq uıymǵa tekserý júrgizdi. Onyń otyz biri keste boıynsha berilgen ruqsat negizinde biliktilik nemese ruqsat berý talaptarynyń sáıkestigin anyqtaý maqsatynda bolsa jáne 31 tekserý Bas prokýratýranyń halyqtyń sanıtarlyq-epıdemıologııalyq salamattylyǵyn arttyrýdaǵy normatıvtik quqyqtyq aktilerdiń talaptaryna sáıkestigine, jospardan tys jasaldy. Tekserilgen 62 statsıonardyń barlyǵynda óreskel talap buzýshylyq anyqtaldy jáne ákimshilik shara qoldanyldy. Tekserý qorytyndysynda oblystyń medıtsına uıymdarynda juqpaly aýrýlardyń aldyn alý boıynsha profılaktıkalyq jáne epıdemııaǵa qarsy is-sharalardyń oryndalmaýy, ınfektsııalyq baqylaý jumysynyń jetkiliksizdigi baıqaldy. Sonymen birge, ǵımarattardaǵy jeldetý júıesiniń jaramdylyǵy, ystyq sýmen qamtamasyz etilý, jóndeý jumystarynyń qajettiligi máseleleri boıynsha da ereje buzýshylyqtar oryn alǵan. Dezınfektsııalyq-sterıldeý rejımderiniń saqtalmaýy da tekserý kezinde júrgizilgen zerthanalyq zertteýler qorytyndysymen rastaldy, - deıdi oblystyq sanıtarlyq-epıdemıologııalyq baqylaý departamentiniń basshysy Ashat Charapıev.
Tekserý nátıjesi boıynsha ereje talaptaryn buzǵan jaýapty tulǵalarǵa jalpy somasy 46 mln teńgege jýyq 84 aıyppul salyndy. Kemshlikti joıý túshin 28 sanıtarlyq uıǵarym berilip, 1 materıal sotqa joldanǵan. Biraq, eshqandaı laýazymdy basshy jumystan shettetilgen joq.
Sondaı-aq, osy tekserýlerdiń nátıjesinde atalǵan 62 medıtsına nysanynyń on besine kúrdeli jóndeý qajet ekeni anyqtaldy. Jalpy, oblystyq densaýlyq saqtaý basqarmasynyń málimetine sáıkes «Aýyldyq densaýlyq saqtaýdy jańǵyrtý» ulttyq jobasy sheńberinde 59 densaýlyq saqtaý mekemesiniń ǵımaratyn salý josparlanǵan. Búginge deıin 22 nysan salynyp qoldanysqa berildi.