Jetisý oblysynda 60 tonna qorǵasyn alyp bara jatqan júk kólikteri ustaldy

ASTANA. KAZINFORM - Shetelge strategııalyq mańyzdy shıkizatty zańsyz áketý áreketteri toqtatyldy. Bul týraly QR ІІM Uıymdasqan qylmysqa qarsy kúres departamentiniń ókili Qýandyq Alpys málimdedi, — dep habarlaıdy Polisia.kz.

Ekonomıkalyq qaýipsizdikti qamtamasyz etýge baǵyttalǵan memlekettik saıasatty iske asyrý aıasynda Іshki ister mınıstrligi qara jáne tústi metall synyqtaryn el aýmaǵynan zańsyz shyǵarý arnalarynyń jolyn kesý boıynsha júıeli jumystar júrgizip keledi.

Osylaısha, Jetisý oblysynda polıtsııa departamentiniń jedel qyzmetkerleri ekonomıkalyq tergeý departamenti jáne keden qyzmetimen birlesip, strategııalyq mańyzdy shıkizat – qorǵasynnyń iri partııasyn zańsyz áketý áreketiniń jolyn kesti. Olar 60 tonnadan astam qorǵasyn tıelgen eki júk kóligin toqtatty, onyń naryqtyq quny 60 mıllıon teńgeden asady. Júk eksportqa jiberilmek bolǵan.

Qazirgi tańda bul qylmysqa qatysy bar barlyq azamattardy anyqtap, ustaý boıynsha is-sharalar júrgizilip jatyr.

Buǵan deıin osyndaı faktiler elimizdiń basqa óńirlerinde de anyqtalǵan bolatyn. Soltústik Qazaqstan oblysynda «joǵary legırlengen bolat» túrinde qara metall synyqtaryn shetelge shyǵaryp jiberýge tyrysqan JShS-niń zańsyz áreketi toqtatyldy. Shamamen 1 myń tonna metall synyǵy, sonyń ishinde kórshiles memleketke jóneltýge daıyn 7 vagon tabyldy.

Mańǵystaý oblysynda Kaspıı mańy elderiniń birine metall synyǵyn teńiz arqyly jóneltý arnasy anyqtaldy. JShS aýmaǵynan 400 tonnadan astam qara metall synyǵy tabylyp, onyń ishinde eki konteıner eksportqa daıyndalyp qoıylǵan.

- Atalǵan barlyq faktiler boıynsha kináli tulǵalar zańnamaǵa sáıkes jaýapkershilikke tartyldy. ІІM strategııalyq mańyzdy resýrstardyń shetelge ketýiniń aldyn alý, eldiń ekonomıkalyq áleýetin saqtaý jáne ulttyq múddege zııan keltirýge jol bermeý úshin osyndaı sharalar qabyldanyp jatqanyn atap ótedi,-delingen mınıstrliktiń habarlamasynda.

Osyǵan deıin ІІM metall synyqtaryn kontrabandalyq jolmen tasymaldaý shemalaryn anyqtaǵany týraly jaz,an edik.