Jetisý oblysynda 6 sıyr urlaǵan azamat 2 jylǵa sottaldy
TALDYQORǴAN. KAZINFORM - Jetisý oblysy Qaratal aýdandyq soty QR Qylmystyq kodekisiniń 188-1- baby, 1-bóligi ıaǵnı mal urlyǵy boıynsha qylmystyq isti qarady. Aıyptalǵan azamat sot úkimimen 2 jylǵa sottaldy.
48 jastaǵy Qaratal aýdanynyń turǵyny jaıylymda qaraýsyz júrgen iri qaralardy óz qorasyna qamap, olardyń qulaqtaryna jańa tańba salǵan. Osy arqyly qylmysyn jasyrýǵa tyrysqan. Quqyq qorǵaý organdary kýágerlerdiń aıǵaqtary men izdestirý sharalarynyń nátıjesinde urlanǵan maldy anyqtady.
Qaratal aýdandyq sotynyń dereginshe zalal mólsheri 1,2 mıllıon teńgeden asqan. (6 iri qaranyń quny)
Qylmystyq áreket úshin zań boıynsha 5 jylǵa deıin bas bostandyǵynan aıyrý nemese balama jaza túrleri qarastyrylǵan. Sottalýshy óz kinásin moıyndap, istegen isine ókinetinin aıtty. Materıaldyq shyǵyndy tolyǵymen ótedi.
«Jábirlenýshi sottalýshyǵa bas bostandyǵynan aıyrmaıtyn jaza taǵaıyndaýdy surady. Osy mán-jaılardy eskere otyryp, sottalýshy mal urlyǵyn jasaǵany úshin kináli dep tanylyp, oǵan 2 jylǵa bas bostandyǵyn shekteý jazasy taǵaıyndaldy», — delingen habarlamada.
Urlanǵan mal óz ıesine qaıtaryldy. Úkim zańdy kúshine endi.
Eske salaıyq buǵan deıin Tekeli qalasynda ıtin óltirip, ıesin sabaǵan azamattyń 1 jylǵa bas bostandyǵynan aıyrylǵanyn jazǵanbyz.
