Jetisý oblysynda 500 myń tonna ónim shyǵaratyn qant zaýyty jańǵyrtylyp jatyr
ASTANA. KAZINFORM - Aýyl sharýashylyǵy vıtse-mınıstri Ermek Kenjehanuly jumys saparymen Almaty jáne Jetisý oblystaryna baryp, agroónerkásip keshenindegi ınvestıtsııalyq jobalardyń júzege asyrylýy, kóktemgi dala jumystary barysymen, sondaı-aq shegirtke zııankesterine qarsy júrgizilip jatqan qorǵanys sharalarymen tanysty.
QR Aýyl sharýashylyǵy mınıstrligi baspasóz qyzmetiniń habarlaýynsha, osy rette vıtse-mınıstr Almaty oblysyndaǵy agrarlyq jáne qaıta óńdeý salasyndaǵy birqatar iri nysandardy aralady. Atap aıtqanda, «Genofond» seriktestiginde boldy.
Kásiporyn basshysy Mahan Tólemisov 800 basqa arnalǵan sút-taýarly fermasynyń qurylys jobasymen tanystyrdy. Bul joba sút óndirisin ulǵaıtyp, óńirdegi qaıta óńdeý salasynyń shıkizattyq bazasyn nyǵaıtýǵa jol ashady.
Odan ári Ermek Kenjehanuly Alataý qalasynda«PepsiCo Central Asia» transulttyq korporatsııasynyń snek ónimderin óndiretin zaýytynyń qurylysyn aralap kórdi. Bul bolashaqta Ortalyq Azııada osy baǵyttaǵy eń iri óndiris ornyna aınalyp, joǵary qosylǵan quny bar aýyl sharýashylyǵy shıkizatyn óńdeý kólemin arttyrýǵa yqpal etedi dep kútilýde.
Al Qonaev qalasynda «Qapshaǵaı Bıdaı Ónimderi» seriktestigi dándi jáne maıly daqyldardy qaıta óńdeýge arnalǵan óndiristik oryndaryn jańǵyrtý jumystary júrip jatyr. Sapar barysynda fıtosanıtarııalyq qaýipsizdik máselesine basa nazar aýdaryldy.
Sapar barysynda vıtse-mınıstr Qonaev qalasy men Jetisý oblysynyń shekaralas aýmaqtarynda shegirtke zııankesterine qarsy hımııalyq óńdeý jumystarynyń sapasyna aıryqna kóńil bóldi.
Qazirgi ýaqytta óńirlerde qorǵanys sharalary 13 myń gektar aýmaqta júrgizildi.
Jetisý oblysyndaǵy alǵashqy nysan Kerbulaq aýdanyndaǵy Jolaman alqaby boldy. Munda «AgroHoldıng Jetisý» seriktestigi zamanaýı sý únemdeý tehnologııalaryn engizý boıynsha iri jobany qolǵa alǵan. Jobanyń quny 4,7 mlrd teńge, 1,4 myń gektar aýmaqty qamtıdy. Joba mal azyqtyq jáne dándi daqyldardyń ónimdiligin turaqty túrde arttyrýdy qamtamasyz etetin joǵary tıimdi sýarý júıesin qurýǵa baǵyttalǵan.
Búginde 1,2 myń gektar jerge egin egildi. Egis alqaptaryna jońyshqa, arpa, júgeri jáne kúnbaǵys sebilgen, qosymsha júgeri egý josparlanyp otyr.
Kóksý aýdanynda vıtse-mınıstr Kóksý qant zaýytyn aýqymdy jańǵyrtý jumystaryna nazar aýdardy. Jobanyń quny — 8 mlrd teńge. Keler jyly kásiporynnyń óndiristik qýaty jylyna 500 myń tonna ónimge deıin ulǵaıtylmaq.
Sondaı-aq Ermek Kenjehanuly «Nam G.N.» aldyńǵy qatarly sharýa qojalyǵynyń qyzylsha alqaptaryn aralady.
Jalpy, bıyl Jetisý oblysyndaǵy egis alqabynyń jalpy kólemi 512 myń gektardan asady. Ártaraptandyrý aıasynda dıqandar dándik júgeri, arpa jáne qant qyzylshasy egiletin alqap kólemin ulǵaıtty. Qazirgi tańda jazdyq daqyldardy kóktemgi egý jumystary 94,6%-ǵa oryndaldy.
Jumys saparynyń qorytyndysy boıynsha Ermek Kenjehanuly jaýapty mamandarǵa kóktemgi dala jumystaryn barlyq agrotehnologııalyq talaptardy saqtaı otyryp, sapaly ári ýaqytyly aıaqtaýdy tapsyrdy.
Osyǵan deıin Qazaqstan mal sharýashylyǵy men agrotehnologııa salasynda Argentına jáne Brazılııamen áriptestikti nyǵaıtqany týraly jazdyq.
