Jetisý oblysynda 256 fermerge 8,2 mlrd teńge jeńildetilgen nesıe berilgen
ASTANA. KAZINFORM — Aýyl sharýashylyǵy vıtse-mınıstri Erbol Tasjúrekov Jetisý oblysynyń sharýalarymen kezdesti, dep habarlaıdy mınıstrliktiń baspasóz qyzmeti.
Vıtse-mınıstr atap ótkendeı, byltyr kóktemgi dala jáne oraq jumystaryna jeńildetilgen qarjylandyrý boıynsha júıeli memlekettik qoldaý sharalarynyń arqasynda, sondaı-aq zamanaýı agrotehnologııalardy keńinen engizý nátıjesinde bizdiń elimiz ekinshi jyl qatarynan ósimdik sharýashylyǵynda joǵary nátıjeler kórsetti.
— Bul ishki naryqtyń qajettilikterin tolyq qamtamasyz etýge jáne eksport kólemin arttyrýǵa múmkindik berdi. Máselen, 2024–2025 marketıngtik jyly 15,3 mln tonna astyq eksporttaldy. Bul ótken jylmen salystyrǵanda (9,6 mln tonna) 60%-ǵa joǵary jáne sońǵy 20 jyldaǵy eń joǵary kórsetkish, — dedi Erbol Tasjúrekov.
Egis alqaptaryn ártaraptandyrý máselesine de erekshe nazar aýdaryldy. Bıyl osy baǵyttaǵy jumystardyń nátıjesinde respýblıka boıynsha egis kólemi 180 myń gektarǵa ulǵaıyp, 23,8 mln gektardy quraıdy.
Jetisý oblysynda egis alqaptary 512 myń gektarǵa deıin ulǵaıady, bul ótken jylmen salystyrǵanda 12 myń gektarǵa artyq. Onyń ishinde júgeri alqaby 47,6 myń gektarǵa deıin ulǵaıtylady, mal azyqtyq daqyldar 91,5 myń gektardy, maıly daqyldar 105,4 myń gektardy quraıdy, al bıdaı egisi ótken jylǵy deńgeıde saqtalyp, 87,6 myń gektar bolmaq.
Kezdesý barysynda vıtse-mınıstr qoldanystaǵy memlekettik qoldaý sharalaryna keńinen toqtaldy.
Óz sózinde ótken jylǵy 1 qazannan bastap kóktemgi dala jumystaryn júrgizý úshin agrarshylardy erte qarjylandyrý tájirıbesi jalǵasqanyn aıta kelip, bıyl bul maqsatqa 750 mlrd teńge qarastyrylyp, onyń ishinde 612 mlrd teńge somasyna 4,5 myńnan astam aýyl sharýashylyǵy taýaryn óndirýshi qarjylandyrylǵanyna toqtaldy.
Al atalǵan óńirde 5% mólsherlememen 256 fermerge 8,2 mlrd teńge somasynda jeńildetilgen nesıe berilgen.
«Damý» qory arqyly qaryzdardy kepildendirý tetigimen, ıaǵnı nesıe somasynyń 85%-yna deıin jabý múmkindigin Jetisý oblysynda 64 sharýashylyq paıdalanǵan. Qarjy kólemi 2,3 mlrd teńge.
Bıyl jeńildetilgen lızıng baǵdarlamasy boıynsha óńirdiń agrarshylary 3,9 mlrd teńgege 99 ótinim bergen.
— Kóktemgi dala jumystaryn jeńildetilgen nesıeleýdiń oń tájirıbesi óńdeý kásiporyndarynyń aınalym qarajatyn tolyqtyrý úshin de osyndaı qoljetimdi nesıeler tetigin keńeıtýge múmkindik berdi. Nátıjesinde 2025 jyly jyldyq «taza» 5% mólsherlememen 44,3 mlrd teńge kóleminde qysqa merzimdi nesıeler bólindi. Jetisý oblysynda 4 mlrd teńge somasyna 8 joba qarjylandyryldy, — dep atap ótti vıtse-mınıstr.
Kezdesýge qatysýshylar arasynda mal sharýashylyǵyn damytýǵa arnalǵan keshendi jospar erekshe qyzyǵýshylyq týdyrdy. Bul baǵytqa 400 mlrd teńge qarastyrylǵan.
Osydan buryn Jetisý oblysynda bıýdjet qarajatyn jumsaý kezindegi zań buzýshylyqtardyń joly kesilgenin jazdyq.
