Jetisý oblysynda 2 myńǵa jýyq turǵyny bar qos aýylǵa gaz berildi
TALDYQORǴAN. KAZINFORM — Jetisý oblysynda jylý berý maýsymy qarsańynda Kóksý aýdanyndaǵy eki aýyldyń turǵyndary gazǵa qol jetkizdi. Bul 2 myńǵa jýyq turǵyny bar Alǵabas jáne Qyzyltoǵan aýyldary. Aýyl turǵyndaryn gazdandyrý sharasy búgin saltanatty túrde atalyp ótti. Qazirgi tańda aýdanda gazdandyrýǵa jatatyn 26 eldi mekenniń 10 aýyly gazdandyryldy. Bul týraly Jetisý oblysy ákiminiń baspasóz qyzmeti málimdedi.
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, búginde Kóksý aýdanynda Terekti, Muqyry, Besqaınar, Musabek, Jambyl, Mámbet, Balpyq bı, Amangeldi aýyldary gazdandyrylǵan. Endi Alǵabas, Qyzyltoǵan aýyldarynyń turǵyndary gazǵa qol jetkizdi.
– Kóksý aýdanynyń atalǵan eldi mekenderinde osy kezeńde 3290-nan astam abonent gazǵa qosylǵan. Sonymen qatar, taǵy 14 eldi mekendi gazdandyrý jumystary júrgizilip jatyr. Bul Kóksý stansasy, Eńbekshiqazaq, Jarlyózek, Talapty, Keńaral, Aqtekshe, Jetijal, Aınabulaq, Qazaqstannyń 10 jyldyǵy, Jeńis (Máýlimbaı), Aqshatoǵan, Boztoǵan, Qaratal, Muqanshy aýyldary. Gaz taratý jelileriniń qurylysy bıyl aıaqtalady. Sondaı-aq qyrkúıek aıynda Nádirizbek eldi mekeninde qurylys-montaj jumystaryn júrgizýge kelisim-shart jasaldy. Podhoz aýylyn gazdandyrý úshin jobalyq-smetalyq qujattama ázirlenýde. Nátıjesinde 2025 jyldyń sońyna deıin gazdandyrýǵa jatatyn eldi mekenniń bárine kógildir otyn beriledi. Osylaısha Kóksý óńiri 100 paıyzǵa gazdandyrylady, – dedi oblystyq energetıka jáne turǵyn úı-kommýnaldyq sharýashylyq basqarmasynyń basshysy Aıdos Beketaev.
Aıta ketý kerek, Alǵabas aýylynda gaz taratý jelilerin qurylys jumystary ótken jyldyń qarasha aıynda bastalǵan. Gaz qubyrynyń uzyndyǵy 38,79 shaqyrymdy qurady. Aýylda 1300 astam adam turady. Búgin alǵashqylardyń biri bolyp Uly Otan soǵysynyń ardagerleri Sársenbaı Qańtarbaı men Jaqan Seısebaevtyń úılerine tegin gaz qubyry tartyldy.
– Aýylǵa kógildir otyn beriledi degen habar bizge áldeqashan kelgen. Soǵys ardageri retinde merdiger kompanııa meniń úıime gazdy tegin júrgizdi. Olarǵa alǵysym sheksiz. Halyqqa jaqsy jaǵdaı jasap jatqan azamattarǵa rızamyn. Elimiz kórkeıip, jastar aman bolsyn, – dedi ardager Sársenbaı Qańtarbaı.
Kópten kútken kógildir otyn búgin 520-ǵa jýyq turǵyny bar Qyzyltoǵan aýylyna da jetti. Bul jańalyq ásirese úı sharýasyndaǵy áıelderdi qýantty. Óıtkeni olar endi otyn tasý, ot jaǵý, kúl shyǵary syndy jumystardy istemeıdi.
– Men osydan elý jyl buryn Qyzyltoǵan aýylynyń azamatyna turmysqa shyqtym. Sodan beri osy aýylda turyp jatyrmyz. Aýylymyzǵa jasalǵan árbir ıgi sharaǵa shyn júrekten qýanyp otyramyz. Ásirese aýylǵa kógildir otyn kelgenine sheksiz rızamyn. Úı sharýasyndaǵy áıelderdiń jumysy jeńildedi. Olar endi ot jaqpaı, qoldary appaq bolyp úıdiń berekesin eselep otyratyn boldy. Bul bizderge jeńil ári yńǵaıly, – deıdi jergilikti turǵyn Jibek Qyryqbaeva.
Jalpy, Qyzyltoǵan aýylyndaǵy qurylys jumystary byltyr qazan aıynda bastalǵan. Gaz qubyrynyń uzyndyǵy 9 shaqyrymnan asty.
Jetisý oblysynda gazdandyrý deńgeıi qazirdiń ózinde 50,5 paıyzdy qurap tur. Jyl sońyna deıin bul kórsetkish 56 paıyzdan asady dep josparlanýda.
