Jetisý oblysynda 2 855 adam «Salamatty Qazaqstan» poıyzy dárigerlerinen medıtsınalyq kómek aldy

TALDYQORǴAN. KAZINFORM – «Salamatty Qazaqstan» medıtsınalyq poıyzy shalǵaı aýdandardaǵy turǵyndarǵa sapaly medıtsınalyq kómektiń qoljetimdiligin qamtamasyz etý maqsatynda jumysyn jalǵastyryp jatyr. Bul týraly densaýlyq saqtaý mınıstrliginiń baspasóz qyzmeti habarlady. 

Mamandandyrylǵan dárigerler toby Jaıpaq, Dostyq jáne Beskól stantsııalarynda qabyldaý júrgizip, turǵyndarǵa medıtsınalyq kómek kórsetti.

Sapar barysynda turǵyndarǵa profılaktıkalyq tekserýler, beıindi mamandardyń keńesteri, bastapqy dıagnostıka jáne alǵashqy medıtsınalyq kómek kórsetildi.

Poıyz jumysy barysynda jalpy 2 855 adam, onyń ishinde 1 241 bala tekserýden ótti.

Halyqqa terapevt, pedıatr, oftalmolog, kardıolog, mammolog jáne basqa da mamandar qyzmet kórsetti. Qajet bolǵan jaǵdaıda patsıentterge qosymsha tekserýler men emdelýge joldamalar berildi. 

Jospar boıynsha bıyl poıyz barlyǵy 123 stantsııaǵa baryp, 90 myńǵa jýyq qazaqstandyqqa kómek kórsetedi. Poıyzdyń marshrýty tolyqqandy medıtsınalyq ınfraqurylymy joq eldiń óńirlerin qamtıdy. 

Jobany Samruk-Kazyna Trust korporatıvtik qory Densaýlyq saqtaý mınıstrliginiń, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen «Samuryq-Qazyna» kompanııalar tobynyń atynan iske asyryp keledi.