Jetisý oblysynda 19 myńnan astam adam ákimshilik raqymshylyqqa ilikti
TALDYQORǴAN. KAZINFORM – Qazaqstanda shilde aıynyń basynan beri qoldanystaǵy «Raqymshylyq jasaý týraly» zań aıasynda Jetisý oblysynda 19 204 adam ákimshilik jaýapkershilikten bosatyldy.
Jetisý oblystyq Polıtsııa departamentiniń málimetinshe, zań 2026 jylǵy 1 shildede kúshine engen. Ákimshilik raqymshylyq qoldanystaǵy zańnama talaptaryna sáıkes azamattardyń eshqandaı ótinishinsiz avtomatty túrde júzege asyrylady.
Polıtsııada atap ótkendeı, raqymshylyq ákimshilik quqyqbuzýshylyqtardyń jekelegen túrlerine ǵana qatysty qoldanylady jáne zań talaptarynyń kúshin joımaıdy.
— Raqymshylyq – eń aldymen memlekettiń izgilik qaǵıdatyna negizdelgen qadamy. Ol azamattarǵa óz áreketine qorytyndy jasap, aldaǵy ýaqytta zań talaptaryn buzbaýǵa múmkindik beredi, — dep málimdedi departamentten.
Sondaı-aq tártip saqshylary jol qozǵalysy erejelerin saqtaýdyń mańyzdylyǵyna erekshe toqtaldy. Olardyń aıtýynsha, árbir jol qozǵalysyna qatysýshynyń jaýapkershiligi adamdardyń qaýipsizdigine tikeleı áser etedi.
Polıtsııa ókilderi óńir turǵyndaryn memleket bergen bul múmkindikti zańdy qaıta buzýǵa sebep emes, kerisinshe jańa paraqtan bastap, zań talaptaryn saqtaýǵa jaýapkershilikpen qaraýǵa múmkindik retinde qabyldaýǵa shaqyrdy.
— Jol qozǵalysy erejelerin saqtaý – zań talaby ǵana emes, barlyq jol qozǵalysyna qatysýshylardyń ómiri men densaýlyǵyn saqtaýdyń kepili, — dep atap ótti polıtsııada.
Eske salaıyq, buǵan deıin 1 shildede Memleket basshysy Qasym-Jomart Toqaev raqymshylyq týraly zańǵa qol qoıǵan bolatyn. Qujat qylmystyq jáne ákimshilik raqymshylyqpen qatar, ákimshilik raqymshylyqty iske asyratyn tsıfrlyq tetikti engizýdi de kózdeıdi.
