Jetisý oblysynda 142 kg balyq pen 6 dana aqbóken múıizi tárkilendi

Jetisý oblysynyń polıtsııasy 1-29 aqpan aralyǵynda «Brakoner» atty jedel profılaktıkalyq is-sharasyn ótkizdi.

Atqarylǵan sharalar nátıjesinde tabıǵatty qorǵaý zańnamasyn buzýshylyqtyń 175 deregi anyqtalyp, olar boıynsha 2 qylmystyq is qoǵalyp, 173 azamat ákimshilik jaýapkershilikke tartyldy.

«Quqyq buzýshylardan zańsyz aýlanǵan 142 kg, balyq, 6 dana (Aqbóken múıizine uqsas) múıiz, 400 metr monojipten toqylǵan aý, 9 qarý tárkilenip, jalpy sommasy 912 myń 560 tenge aıyppul salyndy. Onyń 858 myń 390 teńgesi óndirildi. Memleketke keltirilgen zalal sommasy 922 myń 595 tengeni qurady. Tabıǵatty qorǵaý zańnamasyn buzýshylyqtardy anyqtaý, jolyn kesý jumystary jalǵasýda», – dep atap ótti óńirdegi polıtsııa departamenti tabıǵatty qorǵaý tobynyń bastyǵy Baǵlan Rymjanov.

Jalpy jyl basynan tabıǵatty qorǵaý zańnamasyn buzýshylyqtyń 351 deregi anyqtalyp, olar boıynsha 5 qylmystyq is qoǵalyp, 346 azamat ákimshilik jaýapkershilikke tartyldy.