Jetisý oblysynda 13 saýda nysanynyń alkogol lıtsenzııasy toqtatyldy
ASTANA. KAZINFORM — Jetisý oblysynyń Qaratal aýdanynda alkogol ónimderiniń zańsyz aınalymyna qarsy reıdter kúsheıtildi.
Nátıjesinde 230 lıtr zańsyz alkogol ónimin satý faktisi anyqtalyp, 13 saýda nysanynyń ıesine ákimshilik hattama toltyryldy.
— «Qaýipsiz otbasy — turaqty qoǵam» jobasy aıasynda prokýratýranyń bastamasymen memlekettik kirister organdary, polıtsııa, jergilikti atqarýshy organdar jáne basqa da memlekettik qurylymdardan vedomstvoaralyq jumys toby qurylǵan. Birlesken reıdter kezinde alkogol ónimderin tıisti ruqsatsyz satý, kásipkerlik qyzmetti zań talaptaryn buza otyryp júrgizý jáne taýarlarǵa arnalǵan ilespe júkqujattardy rásimdemeý faktileri anyqtalǵan, — dep habarlady Jetisý oblysynyń prokýratýrasy.
Sot sheshimimen barlyq quqyq buzýshy ákimshilik jaýaptylyqqa tartylyp, olardyń alkogol ónimderin ótkizý lıtsenzııalarynyń qoldanysy toqtatyldy.
Prokýratýranyń málimetinshe, qabyldanǵan sharalar aýdandaǵy qylmystyq ahýalǵa da oń áser etken. Bıyl Qaratal aýdanynda qoǵamdyq oryndarda jasalǵan qylmystar sany 42,1%-ǵa — 19-dan 11-ge deıin azaıǵan. Al mas kúıinde jasalǵan qylmystar 46,2%-ǵa — 13-ten 7-ge deıin tómendegen.
Eske salaıyq, buǵan deıin Oralda kólikten 400 lıtrge jýyq zańsyz alkogol ónimi tabylǵanyn habarlaǵan edik.
