Jetisý oblysynda 12 áleýmettik jańa nysan paıdalanýǵa beriledi
TALDYQORǴAN. KAZINFORM – Bıyl Jetisý oblysynyń Eskeldi aýdanynda 4 mektep pen balabaqsha jóndeýden ótti. Bul týraly óńir ákimi Beıbit Isabaev Eskeldi aýdanynyń turǵyndarymen kezdesýi barysynda aıtty.
Jetisý oblysynyń ákimi Beıbit Isabaevtyń sózinshe, densaýlyq saqtaý, mádenıet jáne sport salalarynda bıyl 12 jańa nysandy iske qosý josparlanǵan. Qazir onyń 5-i paıdalanýǵa berildi, qalǵan altaýynyń qurylysy jeltoqsan aıynyń sońyna deıin aıaqtalady.
— Eshkiólmes jáne Jańalyq aýyldarynda 180 jáne 120 oryndy eki jańa mektep qurylysynyń jobalyq-smetalyq qujattary daıyndalyp jatyr. Al Qarabulaq aýylyndaǵy orta mektep pen Eltaı aýylyndaǵy S. Seıfýllın atyndaǵy mektepke kúrdeli jóndeý jumysynyń jobalyq-smetalyq qujattamasy daıyn. Bıýdjetti naqtylaý kezinde bul eki jobaǵa da tıisti qarajat qarastyrylady, — dep atap ótti B. Isabaev.
Oblys basshysy densaýlyq saqtaý máselesinde tilge tıek etti.
— Ekpindi jáne Jańalyq aýyldarynda eki blokty-modýldi medıtsınalyq pýnkt salyndy.Táýelsizdik kúni qarsańynda Aqeshki aýylynda da iske qosylady. Sol sııaqty «Aýyldaǵy densaýlyq saqtaýdy jańǵyrtý» ulttyq jobasy aıasynda aýdanda 5 nysan salynady, — dedi ol.
Aıtýynsha, mádenıet salasy da nazardan tys qalmaıdy. «Aýyl-el besigi» jobasy aıasynda Qaratal aýylynda 100 oryndyq mádenıet úıiniń qurylysy aıaqtalyp, Qońyr jáne Jalǵyzaǵash aýyldarynda blokty-modýldi klýb qoldanysqa berildi.
