Jetisý oblysynda 100 myń gektardan astam egis alqaby sýaryldy

ASTANA. KAZINFORM — Jetisý oblysyndaǵy «Qazsýshar» RMK fılıaly jergilikti sharýalarmen sý berý boıynsha 7404 kelisimshart jasasqan, dep habarlaıdy Sý resýrstary jáne ırrıgatsııa mınıstrligi.

Búgingi tańda 100 myń gektardan astam egistik jer sýarylyp, 527,5 mln tekshe metr sý alyndy, sondaı-aq 17 myń gektar alqapta ylǵaldandyrý jumysy júrgizildi. Vegetatsııalyq kezeń bastalar aldynda dıqandarmen aýyspaly egisti saqtaý, ylǵaldy kóp qajet etetin daqyldar kólemin qysqartý, sharýashylyqishilik kanaldardy mehanıkalyq jolmen tazalaý, sondaı-aq sý únemdeıtin tehnologııalarǵa kezeń-kezeńimen kóshý boıynsha túsindirý jumystary júrgizildi.

Shilde aıynyń birinshi onkúndiginde jaýyn-shashynnyń az túsýi men aýa raıynyń qolaısyzdyǵyna baılanysty fılıal kanaldar arqyly sýdy kezekpen berý týraly sheshim qabyldady. Sonymen qatar Qaratal aýdanynyń dıqandaryn sýmen qamtamasyz etý úshin Kóksý ózeninen qosymsha sý jetkizildi.

— Barlyq óndiristik ýchaskede sharýalardyń suranysyna sáıkes sý beriledi. Vegetatsııa qalypty rejımde ótip jatyr. Taýly muzdyqtardan bastaý alatyn ózenderdiń deńgeıi jyl boıy jaýǵan jaýyn-shashyn mólsherine jáne aýa temperatýrasyna baılanysty. Fılıal mamandary sýarmaly sýdyń ádil bólinýin turaqty baqylaýda ustap otyr. Qazirgi tańda óńirde jaǵdaı turaqty, — dedi Jetisý oblysyndaǵy «Qazsýshar» RMK fılıalynyń dırektory Saıat Qudaıbergenov.

Buǵan deıin Sý resýrstary mınıstrligi 29 gıdrotehnıkalyq nysanǵa kópfaktorly zertteý júrgizip jatqanyn jazǵanbyz.