Jetisý oblysynda 1 myńǵa jýyq naýqastan qaterli isik anyqtaldy

Jetisý oblysynda ótken 9 aıda onkologııalyq syrqat belgisi bar 6 685 adam tirkeýge alynǵan. Onyń ishinde 1 myńǵa jýyq naýqastan qaterli isik anyqtalyp otyr, - dep habarlaıdy Kazinform.

Ókinishke qaraı, byltyrǵy jylmen salystyrǵanda bıyl onkologııalyq tirkeýge alynǵan naýqastardyń sany 4,2 paıyzǵa kóbeıgen. Anyqtalǵan qaterli derttiń belgileri adamdardyń josparly skrınıngten ótý kezinde bilingen. Dárigerlerdiń deregi boıynsha naýqastar onkologııanyń sút bezi, jatyr moıyny jáne asqazannyń qaterli isigi sııaqty aýyr túrine jıi shaldyǵady eken.

- Qaterli isikti erte kezeńde anyqtaý dertti emdeýdegi mańyzdy qadamdardyń biri. Onyń joly dárigerge der kezinde qaralyp, josparly skrınıngten ótip turý ekenin esten shyǵarmaýymyz kerek. Jyl basynan beri oblystaǵy skrınıngtik jospardyń oryndalýy 81,7 paıyzdy qurady. Nátıjesinde jatyr moıny obyryna shaldyqqan 12 adam, sút bezi obyrynyń belgisi bar 32 naýqas anyqtaldy. Bul jaǵdaıda erte em qabyldaýǵa múmkindik bar, dertten qulan- taza aıyǵýǵa da úmit zor. Ásirese, sút beziniń qaterli isigi áıelderde jıi kezdesedi. Tirkeýdegi onkologııalyq aýrýlardyń 16 paıyzyn quraıdy. Sondyqtan 40 pen 70 jas aralyǵyndaǵy áıelder sút beziniń qaterli isigin anyqtaıtyn skrınıngten mindetti túrde ótýi kerek. Jyl basynan beri bizde 30 myńǵa jýyq áıel tekserilip, 4829 naýqastan isik belgileri anyqtaldy. Ókinishtisi, aýrýdyń qaterli aǵymy 32 áıelden rastaldy, - deıdi Jetisý oblystyq kópsalaly emhanasy dırektorynyń orynbasary Gúlaıym Orazbekova.