Jetisý oblysyna – 4 jyl: «Qorǵas-Shyǵys qaqpasy» AEA-da 65 joba iske asady
TALDYQORǴAN. KAZINFORM – Elimizdiń Qytaımen shekarada ornalasqan «Qorǵas – Shyǵys qaqpasy» arnaıy ekonomıkalyq aımaǵynda ónerkásiptik óndiris pen kólik logıstıkasyn damytýǵa baǵyttalǵan ınvestıtsııalyq jobalar júıeli túrde júzege asyrylyp keledi. Búginde munda 65 joba iske asyrylyp, sonyń negizinde 4 myń jumys orny ashylady dep josparlanǵan. Bul týraly Jetisý oblysy ákiminiń baspasóz qyzmeti habarlady.
Arnaıy ekonomıkalyq aımaqtyń bas dırektorynyń mindetin atqarýshy Shyńǵys Maqashevtiń aıtýynsha, 38 joba paıdalanýǵa berilip, taǵy 27 joba kezeń-kezeńimen iske asyrylyp jatyr.
– Arnaıy ekonomıkalyq aımaqtaǵy mańyzdy jobalarynyń biri – KTZE Khorgos Gateway Qurǵaq porty. Qazirgi ýaqytta qurǵaq portty keńeıtý jumystary aıaqtaldy. Onda 2 jol jańartylyp, 8 qosymsha jol salyndy. Nátıjesinde termınaldyń qýaty jylyna 540 myńnan 800 myń konteınerge deıin ıaǵnı, bir jarym esege artty. Sonymen qatar AEA aýmaǵynda jalpy syıymdylyǵy 70 myń birlik avtokólik quraldaryna deıin jetetin, 19 ýaqytsha saqtaý qoımasyn qamtıtyn logıstıkalyq ınfraqurylym jumys isteıdi, - deıdi ol.
Aımaqta jyl sońyna deıin «Standart steel KZ» JShS metallýrgııalyq kesheni jańǵyrtýdyń 3-kezeńi iske asyrylady. Óndiris orny dırektorynyń orynbasary Dáýren Saqtaǵanovtyń aıtýynsha zaýyt armatýra óndirisine baǵyttalǵan.
– Armatýra kez kelgen qurylysqa qajet bolǵandyqtan jyl basynan jumysty bastap kettik. Bizdiń basty maqsat – ózimizdiń shıkizat, qara temirden armatýra shyǵarý. Búginde metallýrgııalyq keshende 80-ge jýyq jergilikti turǵyn jumys isteıdi. Aldaǵy ýaqytta ónim sanyn arttyrý josparda bar, - deıdi D. Saqtaǵanov.
Budan bólek, «Nomade Invest» JShS «Qorǵas-Shyǵys qaqpasy» temirjol ınfraqurylymyn qurý jónindegi jobany iske asyrýdy josparlap otyr. Sonymen qatar jeńil avtomobılderdi bastapqy tirkeý jáne azamattarǵa keńes berý, Qytaı Halyq Respýblıkasynan ákelinetin kólik quraldaryn tirkeý boıynsha memlekettik qyzmet kórsetýdi uıymdastyrýǵa baǵyttalǵan mamandandyrylǵan sektor qurý, ıaǵnı arnaıy halyqqa qyzmet kórsetý ortalyǵyn ashý josparlanyp otyr.
Taǵy bir aıta keterligi «Qorǵas-Shyǵys qaqpasy»AEA-da Germanııanyń «Skyhansa» kompanııasymen birlesip, halyqaralyq áýejaı salý qolǵa alynýda. Zamanaýı áýejaı 50 myń tonna júk tasymaldap, saǵatyna 500 adamǵa deıin ótýge múmkindik beredi. Jalpy, «Qorǵas-Shyǵys qaqpasy» AEA aýmaǵynda iske asyrylatyn ınvestıtsııalyq jobalar ártúrli salalarda jańa kásiporyndar ashýǵa jáne jergilikti turǵyndar úshin jumys oryndaryn qurýǵa yqpal etedi.
– Prezıdent el ekonomıkasyn damytý maqsatynda ınvestıtsııa tartý jumystaryn kúsheıtýdi tapsyrǵan bolatyn. Osy baǵytta «Qorǵas – Shyǵys qaqpasy» AEA áleýetti ınvestorlardy tartýǵa jaǵdaı jasap, qarqyndy jumys isteýde, – dep atap ótti Shyńǵys Maqashev.
