Jetisý oblysy: Jeke turǵyn úıde tabıǵı gaz jarylyp, 1 adam qaıtys boldy
TALDYQORǴAN. KAZINFORM — Jetisýda jeke turǵyn úı órtenip, 7 adam zardap shekti. Úı ıesi qatty kúıikten kóz jumdy.
Jantúrshigerlik apat 31- shi jeltoqsan kúni bolǵan. Taldyqorǵan qalasynyń irgesindegi 3- bólimshede tabıǵı gaz jarylysynan eki qabatty úıdiń tas- talqany shyqty. TJD- niń málimetinshe órttiń aýmaǵy 120 sharshy metrge jetken.
— 2024 jylǵy 31 jeltoqsanda saǵat 07:18–de Taldyqorǵanda 3-shi bólimshede, meshit mańynda ornalasqan eki qabatty jeke turǵyn úıde órt boldy. Órt gaz-aýa qospasynyń jarylýynan shyǵyp, úıdiń ekinshi qabaty, qabyrǵalarynyń bir bóligi jáne shatyry qulady. Órt sóndirýshiler kelgenge deıin úıden 7 adam, onyń ishinde 3 bala evakýatsııalanǵan. Oqıǵa ornyna jedel túrde órt sóndirý bólimsheleri, Tótenshe jaǵdaılar medıtsınasy ortalyǵynyń dárigerleri jáne qutqarýshylar jetti. Órt tolyqtaı saǵat 07:46–da sóndirildi, — dedi Jetisý oblystyq tótenshe jaǵdaılar departamentiniń baspasóz qyzmeti.
Bútin bir otbasy zardap shekken órtten úı ıesi qaıtys boldy.
— Taldyqorǵan qalasyndaǵy aýrýhanalarǵa tabıǵı gazdyń jarylýynan zardap shekken 7 adam tústi. Taldyqorǵan qalasyndaǵy oblystyq aýrýhanaǵa 2 adam, Taldyqorǵan qalalyq kópsalaly aýrýhanaǵa 3 adam, oblystyq balalar aýrýhanasyna 2 adam tústi. Búgingi kúni 4 adamnyń jaǵdaıy turaqtalyp, travmatologııa bólimine aýystyryldy. 2 patsıent jansaqtaý bóliminde em qabyldap jatyr. Jaǵdaılary óte aýyr. Alǵan jaraqattary saldarynan 1973 jyly týǵan azamat qaıtys boldy, — dedi Jetisý oblystyq densaýlyq saqtaý basqarmasy.
Taldyqorǵan qalasynyń baspasóz qyzmeti de apatqa qatysty arnaıy komıssııa qurylǵandyǵyn habarlady.
Qazirgi ýaqytta jarylystyń sebebin anyqtaý maqsatynda tekserý sharalary júrgizilip jatyr. Bul jaǵdaı qala ákimidiginiń jáne basqa da quzyrly organdardyń turaqty baqylaýyna alyndy. Eske salaıyq osyǵan deıin Rıdderde órtengen úıden 49 jastaǵy er adamnyń qutqarylǵanyn jazǵanbyz.