Jetisý oblysy: SES qurylysyna aýyl turǵyndary alańdap otyr
TALDYQORǴAN. KAZINFORM – Jetisý oblysynda Kóksý ózeniniń jaǵasyna salynatyn SES-ke qatysty aýyl turǵyndarymen talqylaý ótti. Jıyndaǵy jurttyń pikiri ekige jaryldy.
Jetisý oblysy Kerbulaq aýdanynda Rýdnıchnyı SES qurylysyn salýǵa qatysty aýyl adamdarymen jıyn ótti. Jańa qurylysqa qatysty Rýdnıchnyı aýyly halqynyń pikiri ekige bólindi. «Ekologııamyz ben qaýipsizdigimizge kepil joq» dep shýlaǵan topqa aýylda jańa jumys ornymen jańa múmkindikter ashylady deýshiler qarsy ýáj aıtty. Al óńir belsendileri SES Kóksý ózenin qurdymǵa jibere me dep qaýiptenedi.
– Biz bul máseleni nege kóterip, shýlap júrmiz? Aýyl adamdarymen onlaın tyńdalym ótti deıdi. Ony estigen, bilgen adam joq. Áleýmettik jelide shý shyqqan soń ǵana búgin jıyn jasap jatyr. Endi 200 shaqyrymdyq ǵana shaǵyn ózenge memlekettik jospar boıynsha 10 SES salaıyn dep jatyr. Sonyń bári salynsa, ózennen ne qalady? Bógen jasaıdy, sýdy jınaıdy. Raftıng ótkizetin adamdarǵa aıtyp jatyr: ózenniń aǵynyn jasap beremiz dep. Ol qalaı bolady? – dedi ekobelsendi Álııa Ahmedıeva.
Jańa qurylysqa jaýapty mamandar halyqtyń alańdaýyna eshqandaı negiz joq dep sendirdi.
– Biz bul jerge aýqymdy damby emes, sý bógenin ǵana salamyz. Qurylysty qytaılyq bilikti mamandar júrgizedi. Ózen jaǵasyndaǵy jasyl jelek pen sýdaǵy balyqtarǵa eshqandaı zalal kelmeıdi. Kóksý ózeninde uıymdastyrylatyn raftıng jarysyna da kedergi bolmaıdy. 500 jumysshy alamyz, SES iske qosylǵanda 50 turaqty jumys orny ashylady, – dedi qurylysqa jaýapty maman Álı Qarabalın.
Demalys aımaǵy men beıit basyna bara almaı qalamyz degen aýyl turǵyndarynyń shaǵymyna da Qarabalın sheshim tabylatynyn aıtty.
Eske salaıyq, osyǵan deıin jetisýlyq belsendilerdiń dabyl qaqqanyn jazǵanbyz.
