Jetisý oblysy: Panfılov aýdanynda eki sport kesheni ashyldy
Respýblıka kúnine oraı Penjim aýylynda 100 oryndy jáne Úlkenshyǵan aýylynda 90 oryndy sport nysandary paıdalanýǵa berildi, dep habarlaıdy Qazaqparat tilshisi.
Memlekettik baǵdarlamamen salynǵan sport keshenderinde oıyn alańdary men fıtnes zaldary, boks, kúres jáne basqa da sport túrlerine aralǵan sektsııalar jumys isteıdi. 2615.7 sharshy metr aýmaqty alatyn Penjim aýyldyq sport kesheniniń qurlysyna 1 mlrd 115 mln teńge qarjy bólingen.
Al Úlkenshyǵan aýyldyq sport keshenine 1 mlrd teńgeniń qarajaty jumsalǵan. 2057.80 sharshy metrdi quraıtyn keshende qazirdiń ózinde balalar jattyǵýdy bastaǵan.
Sporttyq nysandardyń ashylýynda sóılegen aýdan ákimi Marat Saǵymbek óńirdegi qolǵa alynyp jatqan jumystarǵa toqtaldy.
"Byltyr bizdiń aýdanda 6 sport kesheni paıdalanýǵa berildi. Bunyń barlyǵyn aýyldyń kásipkerleri óz qarajattaryna saldy. Jaqyn kúnderi Jarkent qalasynda jeke azamattardyń qoldaýymen ınvestıtsııalyq quny 500 mln teńgeni quraıtyn sport kesheni ashylady. Sonymen qatar Úsharal aýylynda taǵy bir sport kesheniniń qurylysy bastaldy. Buıyrsa keler jyly paıdalanýǵa beriletin bolady. Biz basqa da aýyldarǵa demeýshiler tarapynan sporttyq nysandardy salýdy jalǵastyra beretin bolamyz", - dedi aýdan ákimi.
Qazirdiń ózinde sporttyq keshenderde aýyl balalary sporttyq sektsııalarǵa jazylyp, jattyǵýdy bastaǵan. Іshi tolyqtaı zamanaýı materıaldyq bazamen qamtylǵan keshenniń ashylýyna aýyl turǵyndary dán rıza.
