Jetisý oblysy Dostyq aýylynda «Keleshek mektebi» ashyldy
TALDYQORǴAN. KAZINFORM — Jetisý oblysy Alakól aýdany Dostyq aýylynda «Keleshek mektebi» ulttyq jobasymen zamanaýı jańa mektep salynyp, paıdalanýǵa berildi.
Alty júz orynǵa arnalǵan bul bilim mekemesi atalǵan joba aıasynda turǵyzylǵan oblystaǵy ekinshi mektep. Buǵan deıin osyndaı 1200 oryndyq Panfılov aýdanynyń Jarkent qalasynda ashylǵan bolatyn.
Jańa mekteptiń ashylýyna arnaıy barǵan oblys ákiminiń orynbasary Dıas Esdáýletov aýyl turǵyndaryn qýanyshtarymen quttyqtady.
— Respýblıkalyq Tamyz konferentsııasynda Prezıdentimiz qala men aýyl mektepterindegi bilim berý deńgeıin teńestirý mindetin qoıǵan bolatyn. Soǵan sáıkes oblysta ásirese aýyldyq jerlerdegi bilim salasynyń ınfraqurylymyn jaqsartýǵa kóp kóńil bólinip keledi. Jyl saıyn mektepterdiń materıaldyq-tehnıkalyq bazasyn nyǵatýǵa da erekshe nazar aýdarylady. «Keleshek mektebi» jobasynyń da negizgi maqsaty osy, — degen Dıas Esdáýletov oqýshylarǵa oqýda tabys, mektep ujymynyń eńbekterine jemis tilep, mektepke avtobýs kóliginiń kiltin tapsyrdy.
Sol sııaqty «Samruk-Kazyna Construction» AQ Ulttyq jobany iske asyrý jáne óńirlik damý jónindegi qurylys departamentiniń dırektory Qaırat Ótegenov tilegin bildirdi. Munan soń «VentKarkara service» qurylys kompanııasynyń dırektory Erkin Ahmetjanov mektep dırektory Aınagúl Sadıevaǵa mekteptiń sımvoldyq kiltin usyndy.
Osydan keıin qonaqtar, jalpy jınalǵan qaýym mekteptiń ishin aralap kórdi. Bul jańa mektep talapqa saı jabdyqtalǵan, munda oqýshylardyń jan-jaqty damýyna barlyq jaǵdaı jasalǵan. Jańa pán kabınetteri, robototehnıka, lıngvıstıka kabınetteri, STEM zerthanasy, kitaphana, sheberhana, horeografııa zaly, ashana jáne basqa da qajetti synyptar men zaldar qarastyrylǵan. Mektepte 59 muǵalim jumys isteıdi. Solardyń ishinde jańadan oqý bitirip kelgen jas mamandar da bar.
— Men mektepti osy Dostyq aýylynan oqyp bitirgenmin. Joǵary oqý ornyn támamdap, jas maman retinde óz aýylyma eńbegimdi sińirýge kelip otyrmyn. Qazaq tili men ádebıeti pániniń muǵalimimin. Alǵashqy eńbek jolymdy osyndaı «Keleshek mektebinen» bastaý — men úshin mártebe. Kórsetilip jatqan ádistemelik kómekter, qoldanýǵa yńǵaıly ınfoqurylymdyq tehnologııalar jas mamandarǵa úlken qoldaý bolady dep oılaımyn, — deıdi Gúlnur Abylaıhanova.
Ata-analar qaýymy da jańa mekteptiń salynǵanyna dán razy.
— Búgin barshamyz úshin erekshe qýanyshty kún. Shalǵaı ornalasqan Dostyq aýylynda bilim men tárbıeniń jańa ordasy ashylyp otyr. Ata-analar qaýymy da, balalarymyz da osy kúndi asyǵa kúttik. Atyna zaty saı zamanaýı tehnıkamen jabdyqtalǵan osyndaı mektepte oqý — bizdiń balalarymyz úshin keremet múmkindik. Sapaly bilim alyp qana qoımaı munda túrli úıirmelerge qatysyp, jan-jaqty damýlaryna barlyq jaǵdaı jasalǵany bizdi qatty qýantty. Endi tek qana jaqsy oqyp, alańsyz bilim alýyn ata-ana retinde qadaǵalap, muǵalimdermen qoıan-qoltyq jumys isteımiz, — deıdi Jadyra Mujybaeva.
Jalpy Jetisý oblysynda Búgingi kúni oblysta 6 mekteptiń qurylysy júrgizilýde, sonyń 3-eýi bıyl qoldanysqa beriledi.