Jetisý mektepteriniń birinde iri kólemde esirtki saqtaǵany úshin 11 jylǵa sottalǵan adam jumys istegen
TALDYQORǴAN. KAZINFORM – Jetisý oblysynyń bilim berý mekemelerinde prokýrorlar 300-den astam sanıtarlyq-epıdemıologııalyq normalar men órt qaýipsizdigin buzý faktilerin anyqtady.
Tekserý barysynda oblystaǵy 5 mektep mańynda jaıaý júrginshiler ótkelderi men «Balalar» belgisi qoıylmaǵany anyqtaldy.
Sarqan aýdany men Taldyqorǵan qalasyndaǵy eki mekteptiń aýmaqtary tolyq qorshalmaǵan, bul olardyń aýmaǵyna bógde adamdardyń ońaı kirip ketýine múmkindik beredi.
«Óńirdiń 60 mektebinde beınebaqylaý kameralarynyń kóbi jumys istemeıdi, onyń 170-i ǵana polıtsııanyń ortalyq jedel bólimderine qosylǵan. Budan bólek, 25 mektep merzimi ótip ketken sanıtarlyq qorytyndylarmen jumys istegen. Keıbir jaǵdaılarda oqýshylarǵa jaramdylyq merzimi ótip ketken dári-dármek pen azyq-túlikti saqtaý faktileri anyqtaldy. 17 mektepte oqýshylardyń tyıym salynǵan ınternet-kontentterge erkin qol jetkizý jaǵdaılary boldy»,- dep habarlady vedomstvodan.
Prokýratýradan málim etkendeı, eńbek zańnamasynyń talaptaryna qaıshy, mektepterde buryn qylmys jasaǵany úshin qylmystyq jaýapqa tartylǵan úsh kúzetshi jumys istegen.
«Máselen, olardyń biri asa iri kólemde esirtki saqtaǵany úshin 11 jylǵa bas bostandyǵynan aıyrylǵan. Sonymen qatar Kerbulaq aýdany bilim bóliminiń esepshileriniń bıýdjet qarajatyn jymqyrý faktileri boıynsha sotqa deıingi tergeý bastaldy»,- delingen habarlamada.
Barlyq anyqtalǵan buzýshylyqty joıý boıynsha 40 qadaǵalaý aktisi engizildi. 135 tulǵa ákimshilik jaýapqa tartylyp, 41adamǵa tártiptik jaza taǵaıyndaldy.
