Jetistikke jetkiń kelse, eshteńeni erteńge qaldyrma – Mıhaıl Shaıdorov
ASTANA. KAZINFORM — 2025 jyly Boston qalasynda (AQSh) ótken álem chempıonatynda kúmis júldege ıe bolǵan qazaqstandyq mánerlep syrǵanaý sportynyń sheberi Mıhaıl Shaıdorov Kazinform tilshisine eksklıýzıv suhbat berdi.
— Bostonda ótken álem chempıonatynda kúmis medal aldyńyz. Sol týrnırden alǵan áserińiz qandaı? Siz maýsym basynda jeńis tuǵyrynan kórinemin degen maqsat qoımaǵanyńyzdy aıtqan edińiz. Mundaı serpiliske qandaı jaǵdaı áser etti?
— Qaı kezde de zor tabysqa qol sozý ońaı emes. Ol úshin kóp ter tógýge týra keledi. Osy maqsatta kóp jumys istedim. Kóptegen qıyndyqty artta qaldyrdym. Bári oılaǵanymdaı júzege asty. Sportta jetistikke jetkeń kelse, eshteńeni erteńge qaldyrýǵa bolmaıdy. Jarys barysynda álemde eshkim jasamaǵan kaskadtardy oryndadym. Sol arqyly jetistikke jol ashyldy. Bir sózben aıtqanda, tógilgen terdiń óteýi qaıtty.
— Álem birinshiliginde sátti óner kórsetkennen keıin Qazaqstan erler arasynda jekeleı synda Olımpıadanyń úsh joldamasyna ıe boldy. Jalpy ulttyq qurama ishinde básekelestik deńgeıin qalaı baǵalaısyz? Aldaǵy Olımpıadada qandaı maqsat qoıyp otyrsyzdar?
— Ózge de sportshylar kóp jumys istep, álemdik deńgeıde tanylǵanyn qalaımyn. Mánerlep syrǵanaý sportynyń keń etek jaıyp, áli de damı túsetinine senemin.
— Álem chempıonatynda erkin baǵdarlama boıynsha kórsetken ónerińiz joǵary baǵalandy. Týrnırge daıyndyq barysy, mýzyka tańdaý jáne eń qıyn elementterdi oryndaýǵa umtylys týraly aıta alasyz ba?
— Jetistigime komanda quramynda eńbek etken barlyq azamat zor úles qosty. Máselen horeograf Vanıa Rıgını maǵan jarys kezinde qoıylatyn kompozıtsııany usyndy. Ol maǵan da unady. Biz ony kóptegen jarysta el nazaryna usynyp júrdik. Ony ásirese Italııa, Túrkııadaǵy jarysty tamashalaǵan jankúıerler jaqsy biledi. Sondaı-aq mundaı múmkindikke qazaqstandyq sportsúıer qaýym da ıe boldy.
— Sátti ótken maýsymnan keıin kóptegen sportshy aldyna jańa maqsat qoıady, kórsetkishin odan saıyn jaqsartqysy keledi. Kelesi maýsymǵa aldyńyzǵa qandaı maqsat-mindetter qoıdyńyz? Aldaǵy ýaqytta qandaı jarystarǵa qatysýdy josparlap otyrsyz?
— Árıne, alda bizdi kóp jumys kútip tur. Mazmundy qıyndatý, syrǵanaý, horeografııa, jańa baǵdarlamalar jasaý sekildi kóptegen túrli ıdeıa bar. Jaraqattan aıyqqannan keıin daıyndyqqa kirisemin. Endi bul baǵytta áli de kóp eńbektene bastaımyn. Alǵa qoıǵan maqsatymdy, oıymdy júzege asyramyn degen senimdemin.
— Hobbıińiz týraly bilgimiz keledi... Mánerlep syrǵanaýda kimdi úlgi tutasyz?
— Japonııalyq sportshy ıÝzýrý Hanıýdy úlgi tutamyn. Sporttyq mansabymda maǵan qoldaý kórsetken adam az emes. Olardyń arasynan bapkerlerim Alekseı Evgenevıch jáne Ivan Rıgınıdi erekshelep atap ótken jón. Olarǵa alǵysym sheksiz. Sondaı-aq otbasyma, horeograf, sporttyq damytý dırektsııasy, demeýshilerge jáne túrli jaǵdaıda maǵan demeý kórsetken barlyq azamatqa rızashylyǵymdy bildirgim keledi. Teledıdar arqyly maǵan jankúıerlik etken tileýlesterime, arenada týymyzdy jelbiretip kózge túsken jankúıerlerge de alǵystan basqa aıtarym joq. Qysqasy, qýanyshty sátte menimen birge qýanyshqa bólengen jandarǵa kóp raqmet.