Jetisaıdaǵy órtten zardap shekken naýqas Shymkentke jetkizildi
TÚRKІSTAN. KAZINFORM – Tótenshe jaǵdaı mınıstrligine qarasty «Kazavıaqutqarý» avıatsııalyq qyzmetiniń bort nómiri EC 145 tikushaq ekıpajy Túrkistan oblysynyń Jetisaı aýdanynan sanıtarlyq reıs oryndap, órtten zardap shekken 1986 jylǵy er adamdy Shymkentke jetkizdi.
– Túrkistan oblystyq aýrýhanasy Shymkent qalasynda ornalasqan, al Jetisaı aýdanynda shuǵyl kómek kórsetý úshin qajetti arnaıy jabdyq jetkiliksiz bolǵandyqtan tasymaldaý qajet boldy. Ekıpaj sanıtarlyq reısti sátti oryndap, zardap shekken adamdy Shymkent qalasyndaǵy gıperbarııalyq oksıgenatsııa ortalyǵyna jetkizdi, – delingen oblystyq tótenshe jaǵdaı departamenti taratqan habarlamada.
Tikushaq jerge qonǵan soń er adam arnaıy medıtsınalyq mamandardyń baqylaýyna tapsyryldy.
Keshe tań ata Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.
Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan.
Órtti barlaý jáne sóndirý barysynda úıdiń ishinen es-tússiz kúıdegi úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda, barlyǵy 12 adamnyń denesi tabyldy.
Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.
Oblys ákimdigi tarapynan zardap shekkender men qaza tapqandardyń otbasylaryna barlyq qajetti medıtsınalyq, psıhologııalyq jáne áleýmettik kómek kórsetilip jatyr. Sonymen birge marqumdardy jerleý rásimin uıymdastyrýǵa tolyqtaı qoldaý jasaldy.
Órtten keıin medıtsınalyq mekemege jetkizilgen úsh adamnyń bireýi esin jıdy.
Vıtse-premer Qanat Bozymbaev órttiń sebebin tergep-tekserý boıynsha qurylǵan Úkimettik komıssııa múshelerine birqatar tapsyrma berdi.
Túrkistan oblysynda 12 adamnyń ómirin qıǵan órttiń aldyn ala sebebi aıtyldy.