Jetisaıdaǵy órtten aman qalǵan áıel adam Shymkentke jetkizildi
TÚRKІSTAN. KAZINFORM – Qazavıaqutqarý avıatsııalyq qyzmetiniń tikushaǵy Túrkistan oblysynyń Jetisaı aýdanynan Shymkent qalasyna sanıtarlyq reıs oryndady.
Sanıtarlyq reıs «Ulttyq shuǵyl medıtsınany úılestirý ortalyǵy» RMQK-nyń úılestirýimen uıymdastyryldy. Reıs barysynda Túrkistan oblysyndaǵy órtten zardap shekken, 1990 j.t. áıel adam Shymkent qalasyndaǵy gıperbarııalyq oksıgenatsııa ortalyǵyna jetkizildi.
- Gıperbarııalyq ortalyq Shymkentte ornalasqan, al Jetisaı aýdanynda shuǵyl medıtsınalyq kómek kórsetýge qajetti arnaıy jabdyqtar jetkiliksiz bolǵandyqtan, naýqasty tasymaldaý qajet boldy. Ekıpaj sanıtarlyq reısti sátti oryndap, barlyq qaýipsizdik sharasyn saqtaı otyryp, zardap shekken áıeldi mejeli jerge jetkizdi, - delingen oblystyq Tótenshe jaǵdaılar departamenti taratqan aqparatta.
Qoný sátinen keıin ol arnaıy mamandandyrylǵan dárigerlerdiń baqylaýyna tapsyryldy.
18 qarasha kúni Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.
Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan.
Órtti barlaý jáne sóndirý barysynda úıdiń ishinen es-tússiz kúıdegi úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda, barlyǵy 12 adamnyń denesi tabyldy.
Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.
Oblys ákimdigi tarapynan zardap shekkender men qaza tapqandardyń otbasylaryna barlyq qajetti medıtsınalyq, psıhologııalyq jáne áleýmettik kómek kórsetilip jatyr. Sonymen birge marqumdardy jerleý rásimin uıymdastyrýǵa tolyqtaı qoldaý jasaldy.
Órtten keıin medıtsınalyq mekemege jetkizilgen úsh adamnyń bireýi esin jıdy.
Vıtse-premer Qanat Bozymbaev órttiń sebebin tergep-tekserý boıynsha qurylǵan Úkimettik komıssııa múshelerine birqatar tapsyrma berdi.
Túrkistan oblysynda 12 adamnyń ómirin qıǵan órttiń aldyn ala sebebi aıtyldy.
Keshe Jetisaıdaǵy órtten zardap shekken naýqas Shymkentke jetkizilgen bolatyn.