Jetisaıdaǵy órtten aman qalǵan 3 adamnyń bireýi esin jıdy

TÚRKІSTAN. KAZINFORM – Bul týraly oblys ákiminiń birinshi orynbasary Zulpyhar Joldasov BAQ ókilderine bergen suhbatynda aıtty.

– Jetisaı aýdanyndaǵy órt kezinde jalpy 12 adam qaza tapty, onyń 9-y kámelet jasqa tolmaǵandar. 3 adam aman qaldy. Qazir olar jansaqtaý bóliminde em qabyldap jatyr. Onyń bireýi esin jıdy. Saǵat tańǵy 5:38-de órt sóndirý bólimine habarlama kelgen. Munda gaz qazandyqtary syrtta ornalasqan eken. Qazir osy boıynsha tıisti mamandar, sarapshylar anyqtap jatyr. Memleket basshysynyń tapsyrmasy boıynsha Úkimetten komıssııa quryldy. Zardap shekkender men qaza tapqandardyń jaqyndaryna barlyq qajetti kómek kórsetilip jatyr, qaıǵyly oqıǵa tergelip, jan-jaqty tekseriledi, – dedi ol.

Búgin tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. 

Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan.

Órtti barlaý jáne sóndirý barysynda úıdiń ishinen es-tússiz kúıdegi úsh adam evakýatsııalanyp, jedel medıtsınalyq járdem brıgadasyna tapsyryldy. Úıdiń ishinen toǵyz balany qosa alǵanda, barlyǵy 12 adamnyń denesi tabyldy.

Kórshilerdiń aıtýynsha, aldyńǵy kúni úı ıeleri is-shara ótkizgen, úıde qonaqtar bolǵan. Órt 360 sharshy metr aýmaqta tolyqtaı sóndirildi.

Oqıǵa ornynda barlyq jedel qyzmet jumys istep jatyr. Órttiń shyǵý sebebi belgisiz. Tergeý bastaldy.

Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty. 

Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.

Órtten keıin medıtsınalyq mekemelerge úsh adam — eki eresek jáne bir bala jetkizildi. Vedomstvo aqparatyna sáıkes, qazir barlyǵy reanımatsııa bóliminde jatyr, jaǵdaıy aýyr, biraq turaqty.

Oblys ákimdigi tarapynan zardap shekkender men qaza tapqandardyń otbasylaryna barlyq qajetti medıtsınalyq, psıhologııalyq jáne áleýmettik kómek kórsetilip jatyr. Sonymen birge marqumdardy jerleý rásimin uıymdastyrýǵa tolyqtaı qoldaý jasaldy.