Jetisaıdaǵy demalys saıabaǵy satylymǵa shyqty
TÚRKІSTAN. KAZINFORM – Jetisaı qalasyndaǵy saıabaq senimgerlik basqarýǵa beriledi. Saýda sattyq 24 jeltoqsan kúni saǵat 10:00 bastalady. Kepildik jarna: 4 699 350,00 teńge. Qazirgi kezde elektrondyq saýda alańynda ótinim qabyldaý jumystary júrip jatyr. Konkýrs jeńimpazy 8 gektardan astam jerdi 15 jylǵa senimgerlik basqarýǵa alady.
Jetisaıdaǵy basseıni bar ortalyq saıabaqtyń jalpy aýdany 17 gektardy quraıdy. Aýdan ákimdiginiń málimetinshe, 2022-2023 jyldary aýmaqtyń jartysy qaıta qalpyna keltirilgen. Alaıda saıabaqtyń 8 gektardan astam jeri ózgerissiz qalyp, keıinnen satyp alý quqyǵynsyz konkýrsqa shyǵarylyp otyr.
Erejege sáıkes, konkýrsqa jalǵyz qatysýshy tússe de ótti dep tanylady. Al, senimgerlik basqarýǵa alýshy tek 15 jyl ǵana ıelik etedi. Al, keıinnen satyp alýǵa quqy joq.
Tenderlik konkýrstyń sharttaryna toqtalsaq:
Konkýrs jeńimpazy nysandy negizgi maqsattarǵa sáıkes paıdalanýǵa; Nysandy Qazaqstan Respýblıkasynyń barlyq qurylys, órt qaýipsizdigi, sanıtarlyq, ekologııalyq normalaryna keltirýge jáne obektiniń saqtalýyn qamtamasyz etýge; Obektini senimgerlik basqarýshynyń qarajaty esebinen qajetti ınfraqurylymmen qamtamasyz etýge;
Jetisaı qalasynyń turǵyndaryn tarta otyryp, eńbekti qorǵaý jónindegi normalardy saqtaı otyryp, jańa jumys oryndaryn qurýǵa;
Kommýnaldyq qyzmetter boıynsha barlyq mindettemelerdi oryndaýǵa; Obektiniń saqtalýyn qamtamasyz etýge; Keıinnen satyp alý quqyǵynsyz senimgerlik basqarý merzimi ishinde ınvestıtsııalar salýǵa jáne saıabaqqa qosymsha balalar oıyn alańdaryn ornatýǵa;
Nysandy keıingi satyp alý quqyǵynsyz senimgerlik basqarýǵa berý kezeńi ishinde týyndaıtyn salyqtyq mindettemelerdi ýaqtyly oryndaý;
Senimgerlik basqarýǵa berilgen merzim ishinde nysanǵa 300 000 000 teńge ınvestıtsııa quıýǵa;
Jańa attraktsıondardyń ornalasý jobasynyń ázirlenýin, kelisýin, bekitilýin qamtamasyz etý jáne oǵan qajetti ruqsat berý qujattaryn alynýyn qamtamasyz etý jáne kelisim shartqa turǵan merzimnen bastap 1 jyl ishinde jańa attraktsıondardyń 50 % qosylýyn qamtamasyz etýge mindetti.
Eske sala keteıik, Pavlodar áýejaıy jeke menshikke ótetinin jazǵan bolatynbyz.