Jetisaıda kelinshekti óltirgen kúdiktini qandaı jaza kútip tur

TÚRKІSTAN. KAZINFORM – Jınaqtalǵan qujattar aı sońynda sotqa joldanady.

Túrkistan oblysy polıtsııa departamenti usynǵan aqparatqa súıensek, Jetisaı aýdanynyń joǵalǵan turǵynyn óltirý deregi boıynsha qylmystyq is qozǵalǵan.

Jedel-izdestirý is-sharalary barysynda kúdikti, ıaǵnı jergilikti turǵyn anyqtalyp, ustaldy. Ol birden qamaýǵa alyndy.

Aldyn ala málimetter boıynsha, qylmys turmystyq janjal negizinde bolǵan. Búginde sotqa deıingi tergep-tekserý jáne barlyq mán-jaılardy anyqtaýǵa baǵyttalǵan basqa da qajetti is-sharalar júrgizilýde.

- 28 qańtar kúni Jetisaı APB-ǵa jergilikti turǵyn aryzdanyp, ózimen birge turatyn qyzy úıinen shyǵyp ketip, iz-túzsiz joǵalǵanyn habarlaǵan. Habarlama boıynsha jan-jaqty izdestirý sharalaryn atqarǵan polıtseıler 8 aqpan kúni joǵalǵan qyzdyń máıitin tapqan.

Áleýmettik jelide jarııalanǵan kelinshektiń beıitin atpen taptady degen aqparat pen maqalada kórsetilgen jábirlenýshini kúdikti qorqytyp aqsha alǵan, nesıe aldyrǵan degen aqparat shyndyqqa janaspaıdy. Tergeý isi jan-jaqty, obektıvti túrde júrgizilip, jınaqtalǵan qujattar osy aıdyń sońyna qaraı sotqa joldanady. Kúdikti áreketi QR QK-niń 99-babynyń 1-bóligimen saralanǵan, - delingen vedomstva aqparatynda. 

Al, Jetisaı aýdanynyń prokýrory QR QPK-niń 24-babynyń talaptaryna sáıkes sotqa deıingi tergep-tekserý amaldary jan-jaqty tolyq, obektıvti túrde júrgizililip jatqanyn málimdedi.

Sondaı-aq, qylmystyq is aýdan prokýratýrasynyń baqylaýynda ekendigin jetkizdi.

Aıta keteıik, budan buryn bloger Murat Ábdilda qaıtadan qamaýǵa alynǵandyǵyn jazǵan bolatynbyz.