Jetisaıda qaýyn pisti
JETІSAI. KAZINFORM – Jetisaılyq sharýalar erte pisken qaýyndaryn shetelge jóneltip, eksportty bastap ketti.
Ál-Farabı Kúzenbaev basqaratyn «Ál-Farabı» sharýa qojalyǵy alǵashqy 100 tonna ónimin Reseı Federatsııasyna eksporttap jatyr. Dıqan 50 gektar jerge «Nur-Bakınka» jáne «Dampera» sortty qaýyndar ekse, qosymsha 250 gektar alqapqa maqta shıtin sepken. Qaýyn kóshetteri aýa raıynyń erekshelikterine baılanysty josparlanǵan 65 kúnnen sál uzaǵyraq – 70 kúnde pisip jetildi.
– Bıyl qaýynymyz da pisti. Reseı naryǵynan suranys joǵary. Qaýynnyń kelisin egistik basynan 400 teńgeden ótkizip jatyrmyz. Eshqandaı deldalsyz, ózimiz tıep jiberip jatyrmyz, – deıdi sharýa qojalyǵynyń tóraǵasy.
Sharýashylyq búginde 30-ǵa jýyq jergilikti turǵyndy maýsymdyq jumysqa tartqan. Olarǵa kún saıyn 8-12 myń teńge aralyǵynda jalaqy tólenedi. Jalpy dıqan gektarynan 400 tsentner ónim alýdy josparlap otyr.
Aıta keteıik, Jetisaı aýdany boıynsha aýyl sharýashylyǵy jumystary qarqyndy júrip jatyr. Bıyl 79,3 myń gektar sýarmaly jerdiń 43 myń gektaryna maqta,16,7 myń gektaryna baqsha, 7,5 myń gektaryna dándik júgeri, 3,6 myń gektaryna kókónis, 6,7 myń gektaryna mal azyqtyq daqyldar egilgen. Qazir aýdan dıqandary 36 myń tonna kókónis ónimin jınap úlgerdi.
Aıta keteıik, budan buryn Túrkistan oblysynda polıgondarynyń 70 paıyzy sanıtarlyq-ekologııalyq talaptarǵa saı emes ekendigin jazǵan bolatynbyz.