Jetisaıda qaýyn pisti
TÚRKІSTAN. KAZINFORM – Jetisaılyq sharýalar qaýyn eksportyn bastap ketti. Alǵashqy ónim Reseıge jóneltilip jatyr.
Búginde Jetisaı topyraǵyna egilgen qaýyn daqyldarynyń alǵashqy legi pisip úlgerdi. Qazir dıqandar egistik alqabynan terip alǵan ónimderin eksportqa daıyndap jatyr. Sonyń biri – jergilikti turǵyn Ál-Farabı Kúzenbaev. Birneshe jyldan beri dıqanshylyqpen aınalysyp júrgen sharýa Abaı aýyldyq okrýgindegi 45 gektar jerine erte kóktemde egin ekken bolatyn.
«Aqpan aıynda otyrǵyzylǵan qaýynnyń «bakınka» sorty jospardaǵy 65 kúnde emes, aýa raıynyń jaýyn-shashyndy bolýy saldarynan 90 kúnde jeýge jaramdy boldy. Endi suranysqa sáıkes Reseı Federatsııasynyń Máskeý qalasyna eksporttap jatyrmyz. Bıyl qaýynymyz jyldaǵydan sál keshteý pisti. Suranys ta jaqsy. Aǵyn sýdan qıynshylyqtar bolǵanymen, tapshylyq sezilmedi. Baǵa jaman emes, kelisi 600 teńgeden bolyp jatyr. Eshqandaı deldalsyz ónimdi egistik basynan ózimiz kólikterge tıep, jiberip jatyrmyz», - deıdi «Ál-Farabı» sharýa qojalyǵynyń tóraǵasy Ál-Farabı Kúzenbaev.
Aıta keteıik, bıyl aýdandaǵy sýarmaly jerdiń 20 myń gektaryna egilgen baqsha daqyldarynyń 16 myń gektary qaýyn bolsa, 4 myń gektary qarbyz daqyly. Ótken jyly 18 780 gektar alqapqa egilgen baqshanyń 14 myń gektary qaýyn, 4,6 myń gektary qarbyz bolǵan. Al jalpy alynǵan ónim kólemi – 514,3 myń tonna.
