Jetisaıda qarbyz pisti
TÚRKІSTAN. KAZINFORM — Jetisaılyq dıqandar alǵashqy ónimdi Reseıge eksporttap jatyr. Aýdan aýmaǵyndaǵy 4 myń gektar jerge qarbyz ekken sharýalar bıyl mol ónim alamyz dep josparlap otyr.
Atameken aýyldyq okrýgindegi «Pavel» sharýa qojalyǵy 9 gektar egistikke 20 jyldan beri baqsha daqyldaryn egip keledi.
Bıylǵy jyly da mundaǵy dıqandar qarbyzdyń erekshe kútimdi qajet etetin «Vıktorııa» sortyn sáýir aıynyń basynda ekken bolatyn. Qajetti agrotehnıkalyq sharalardyń der kezinde jasalýynyń nátıjesinde pisip jetilgen qarbyzdan mol ónim alynady dep josparlanyp otyr. Sondaı-aq, aǵyn sýdy únemdeý maqsatynda engizilgen tamshylatyp sýǵarý ádisi ónimniń artýyna da septigin tıgizip otyr.
«Alǵashqy ónimdi qazir Reseıge jiberip jatyrmyz. Keıin suranysqa qaraı ózge de óńirlerge jiberemiz. Jyldaǵydan shyǵyn kóp bolǵanymen baǵasy da joǵary bolyp tur. Qazir kelisin 150-170 teńge aralyǵynda satyp jatyrmyz. Tamshylatyp sýǵarý ádisin qoldanatyndyqtan aǵyn sýdan, mıneraldy tyńaıtqyshtardan qıyndyq kórmedik. Ónimdilik te oıdaǵydaı», — dedi sharýa qojalyq tóraǵasy Asan Mýbınov.
Jetisaılyq sharýalar bıylǵy jyly 79,3 myń gektar sýarmaly jerdiń 40,8 myń gektaryna maqta shıtin sepse, 20,1 myń gektar jerge baqsha, 7,2 myń gektar jerge dándik júgeri, 3,3 myń ga jerge kókónis pen 6,3 myń gektar jerge jońyshqa daqylyn ekken.
«Aýdandaǵy 20,1 myń gektarǵa egilgen baqsha daqyldarynyń 4 myń gektary qarbyz. Bıylǵy jyly 600 myń tonnadan astam baqsha ónimderi jınalady dep josparlanyp otyr. Byltyrǵy jyly da baqsha daqyldarynan joǵary deńgeıde ónim alynyp, oblysta úzdikterdiń qatarynan kóringenbiz», - dedi aýdandyq aýyl sharýashylyǵy jáne jer qatynastary bóliminiń basshysy Nurtas Tursynbekov.
