Jetisaı monoqalalar sanatyna qosyla ma

Túrkistan oblysynyń Jetisaı qalasy monoqalalar sanatyna ene me? Bul suraqqa Jetisaı aýdanynynyń ákimi Serik Mamytov jaýap berdi, dep habarlaıdy Kazinform.

Túrkistan Óńirlik kommýnıkatsııalar qyzmetinde ótken brıfıngide Serik Mamytov Jetisaı qalasy monoqalalar sanatyna halqynyń sany 60 myńnan asqanda ǵana enetindigin málimdedi. Qazir turǵyndar sany oǵan jetpeıdi.

«Osy máseleni kópshilik suraıdy. Monoqala bolý úshin qaladaǵy halyqtyń sany qatelespesem 60 myńnan asýy kerek. Qazir Jetisaıda 47 myń halyq bar. Ol úshin kóbeıýimiz kerek», – dedi Serik Mamytov.

Jalpy búginde aýdanda óńirlik ónim kólemi 9 aıdyń qorytyndysymen 102,1 mlrd teńgeni quraǵan. Bul kórsetkish ótken jyldyń sáıkes kezeńimen salystyrǵanda 14,3 mlrd teńgege joǵary.

Aýdanda aýyl sharýashylyǵy salasynyń da áleýeti joǵary. Esepti merzim ishinde aýyl sharýashylyǵynda óndirilgen ónimniń jalpy kólemi 69,2 mlrd teńgeni quraǵan. Al negizgi kapıtalǵa tartylǵan ınvestıtsııa kólemi 5,4 mlrd teńgege jetip otyr.

Jetisaı qalasynyń aýmaǵyn ulǵaıtýǵa 80 ga jer bólingen bolatyn. Búgingi kúni onda kópsalaly zamanaýı ońaltý ortalyǵy men saýda, oıyn-saýyq kesheniniń qurylysy boıynsha jumystar júrgizilip jatyr.