Jetisaı men Shardarada 500-den astam uńǵyma qaıta jańǵyrtylyp jatyr
ASTANA.KAZINFORM - Túrkistan oblysynda 512 tik drenaj uńǵymasyn qalpyna keltirý jumystary aıaqtalýǵa jaqyn.
Túrkistan oblysynda 512 tik drenaj uńǵymasyn qalpyna keltirý boıynsha qurylys-montaj jumystary aıaqtalýǵa jaqyn. Joba aıasynda Jetisaı aýdanynda 210 uńǵyma, al Shardara aýdanynda 302 uńǵyma qalpyna keltirilip jatyr.
Qazirgi tańda 512 uńǵymanyń barlyǵy tolyq burǵylanyp boldy. Nysandarda qurylys-montaj jumystary júrgizilip jatyr. Olardy osy jyldyń birinshi jartysynyń sońyna deıin aıaqtaý josparlanyp otyr.
Joba nátıjesinde Túrkistan oblysynyń Jetisaı jáne Shardara aýdandaryndaǵy 101,5 myń gektardan astam sýarmaly jerdiń melıoratıvtik jaǵdaıy jaqsarady dep kútilip otyr.
— Tik drenaj júıeleri jerasty sýy deńgeıin turaqtandyrý, topyraqtyń qaıtalama tuzdaný qaýpin azaıtý jáne sýarmaly jerlerdiń jaı-kúıin jaqsartý úshin asa qajet. Júrgizilip jatqan sharalar sý resýrstaryn utymdy paıdalanýǵa jáne óńirdegi agrarlyq sektordyń turaqty damýyna baǵyttalǵan, — dedi Sý resýrstary jáne ırrıgatsııa vıtse-mınıstri Erbolat Ibraıhanov.
Aıta ketelik Sý resýrstary mınıstrligi úsh oblystaǵy sý qoımalarynda shaǵyn SES salmaq.
