Jetisaı men Saryaǵashta toqyma óndirisin damytý úshin ózbekstandyq kompanııalarymen kelissóz júrgizilip jatyr
ASTANA. KAZINFORM – Jetisaı men Saryaǵash aýdandarynda toqyma óndirisin damytý úshin ózbekstandyq kompanııalarymen kelissózder júrgizilip jatyr. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Oblystardyń ákimdikteri shekara mańyndaǵy eldi mekenderge ınvestorlar tartý esebinen ınvestıtsııalyq jobalardy iske asyrý jónindegi sharalar qabyldap jatyr. Mysaly, Almaty oblysynyń shekara mańyndaǵy Uıǵyr aýdanynda modıfıkatsııalanǵan krahmal men jylyjaı óndiretin zaýyt salý boıynsha ınvestıtsııalyq joba iske asyrylyp jatyr. Sondaı-aq keleshekte zamanaýı mal sharýashylyǵy keshenin salý jobasy iske asyrylatyn bolady», - dedi Oljas Bektenov.
Munan bólek, Úkimet basshysynyń atap ótýinshe, Jambyl oblysynyń shekara mańyndaǵy Qordaı aýdanynda «Korcem» JShS sıngapýrlyq kompanııasynyń qatysýymen tsement óndirý boıynsha ınvestıtsııalyq joba iske asyrylady. Qazirgi ýaqytta qurylys-montajdaý jumystary júrgizilip jatyr. Sonymen qatar Qordaı aýdanynda nemis kompanııasynyń qatysýymen taý-ken metallýrgııa kombınatyn salý jáne altyn ken oryndaryn ıgerý boıynsha «Monterra Qasaqstan» JShS ınvestıtsııalyq jobasyn qolǵa alyndy.
«Túrkistan oblysynyń shekara mańyndaǵy Jetisaı, Saryaǵash aýdandarynda maqta-qaǵaz ónimderin qaıta óńdeý zaýytyn salý, toqyma fabrıkasyn salý úshin Ózbekstan Respýblıkasynyń «Global Textile», «Gurlan Global Teks» jáne «Tulpar Textille» kompanııalarymen kelissózder júrgizildi. Osyǵan uqsas ınvestıtsııalyq jobalar basqa óńirlerde de iske asyrylyp jatyr», - dedi Premer-Mınıstr.
