Jetisaı men Maqtaaral aýdandarynda 74 587 ga egis alqaby sýaryldy
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Túrkistan oblysyna jumys saparymen baryp, jergilikti dıqandardy sýarmaly sýmen qamtamasyz etý jumystarynyń barysymen tanysty.
Sý vedomstvosynyń basshysy Qazaqstan men Ózbekstan arasyndaǵy transshekaralyq sýdy bóletin «Dostyq» memleketaralyq kanalyna bardy. Qazirgi ýaqytta sý bizdiń elge buryn qol jetkizilgen halyqaralyq kelisimderge sáıkes jetkizilip, Jetisaı jáne Maqtaaral aýdandaryndaǵy egis alańdaryn sýarýǵa paıdalanylady.
Búgingi tańda «Qazsýshardyń» Túrkistandaǵy fılıaly Maqtaaral aýdanynyń sharýalarymen sýarmaly sý berýge 3 223 kelisimshart jasasty, Jetisaı aýdany boıynsha 1 492 kelisimshart jasaldy. Qazirgi ýaqytta Jetisaı aýdanynda sýarmaly jer kólemi - 47 332 ga, Maqtaaral aýdanynda - 27 255 ga.
Odan keıin mınıstr «Mashınalyq ádispen sý kóterý kanalynyń» jumysymen tanysty. «Qazsýshardyń» Túrkistandaǵy fılıaly nysandy mehanıkalyq jolmen tazalaýdy aıaqtap qaldy.
«Kelisimshart jasaǵan sý paıdalanýshylarmen mindettemelerdi oryndaý úshin kanaldar boıynsha kezekpen sý berý júrgiziledi, al mınıstrliktiń jumys toby men Aral-Syrdarııa basseındik ınspektsııasy sý paıdalanýdyń zańdylyǵyn qatań baqylaýda ustaıdy. Sondaı-aq sýdy kelisimshartsyz tutynǵandarǵa jáne sý jetkizýshiniń kelisiminsiz ósiriletin daqyldardyń túrin ózgertkenderge aıyppul qarastyrylǵan. Biraq dıqandar da sý únemdeý tehnologııalaryna kóship, ylǵaldy kóp qajet etetin daqyldardy egýdi azaıtý arqyly sý resýrstaryn únemdeýge óz úlesterin qosýy kerek. Memleket bul úshin sýbsıdııalar túrinde barlyq qajetti jaǵdaıdy jasady», - dedi Sý resýrstary jáne ırrıgatsııa mınıstri Nurjan Nurjigitov.
Bıyl Túrkistan oblysynda kúrish egý jospary 3,3 eseden asyp ketkenin eske sala keteıik. Sýarmaly sý tapshylyǵy qaýpine jáne 4000 ga shekti kólemge qaramastan, «Qazsýshardyń» jergilikti fılıaly dıqandarmen 13 258 ga kúrish alqaptaryn sýarýǵa 1 047 kelisimshart jasasqan. Osyǵan baılanysty fılıaldyń birqatar basshysyna qatań sógis berildi.
Buǵan deıin Sý resýrstary jáne ırrıgatsııa mınıstrligi Qazaqstannyń ońtústiginde sýarý kezeńiniń turaqty ótýin qamtamasyz etý úshin arnaıy jumys toptaryn qurǵan bolatyn. Bul toptar jergilikti atqarýshy organdarmen birlesip táýlik boıy kezekshilik júrgizedi. Túrkistan oblysyndaǵy vegetatsııalyq kezeń mınıstrliktiń baqylaýynda.
Aıta keteıik, Sý resýrstary mınıstrligi sýdy ortaq paıdalanýdyń erejelerin bekitti.