Jetisaı bilim bólimi basshylyǵy esepshilermen birge 4 mlrd teńgeni jymqyrǵan
JETІSAI. KAZINFORM — Túrkistan oblysy prokýratýrasy Jetisaı aýdany bilim bóliminiń qyzmetkerlerine qatysty memlekettik qarajatty asa iri mólsherde jymqyrý faktisi boıynsha sotqa deıingi tergeýdi jalǵastyryp jatyr.
Tergeý barysynda aýdandyq bilim bóliminiń basshylyǵy men esepshileri ózderiniń, sondaı-aq týystary men tanystarynyń esepshotyna belgilengen jalaqydan joǵary aqsha aýdarý arqyly bıýdjet qarajatyn jymqyrýdyń qylmystyq shemasyn jasaǵany anyqtaldy.
2021-2023 jyldar aralyǵynda memleketke 4 mlrd teńgeden astam zalal kelgen.
Oblys prokýratýrasynyń arnaıy prokýrorlary 41 qyzmetkerdi, onyń ishinde 2 bilim bóliminiń basshysyn, 1 bas esepshi, 2 orynbasaryn jáne 36 esepshini kúdikti retinde tanydy.
Aýdannyń burynǵy jáne qazirgi bilim bóliminiń basshylary ızolıatorǵa jabylyp, sottyń sanktsııasymen qamaýǵa alyndy.
Qazirgi ýaqytta qylmystyq jolmen alynǵan aqshany jáne ózge de múlikti zańdastyrýdyń barlyq mán-jaıy men faktisin anyqtaýǵa baǵyttalǵan tergeý júrip jatyr.
Ózge aqparat QPK 201-babynyń talaptaryna sáıkes jarııalanbaıdy.
