Jetisaı aýdanynda sý tapshylyǵy joq — mınıstrlik

ASTANA. KAZINFORM — Túrkistan oblysy Jetisaı aýdanyndaǵy sharýalar jazdyń basynan beri sýarmaly sý almaǵany jónindegi aqparat shyndyqqa sáıkes kelmeıdi. Bul týraly QR Sý resýrstary jáne ırrıgatsııa mınıstrligi málimdedi.

Vedomstvonyń málimetinshe, bıylǵy vegetatsııalyq kezeń bastalǵaly beri Jetisaı aýdanynyń dıqandaryna 236,1 mln tekshe metr sý jetkizilgen. Qazirgi ýaqytta aýdan aýmaǵyndaǵy egis alqaptaryna sekýndyna 32 tekshe metr sý berilip, sýarý jumystary kezekpen júrgizilýde.

Mınıstrlik «Dostyq» magıstraldyq kanaly arqyly shilde aıynyń alǵashqy kúnderinde Qazaqstanǵa sekýndyna 80 tekshe metr sý keledi dep josparlanǵanyn, alaıda naqty kórsetkish 50 tekshe metr kóleminde bolǵanyn atap ótti. Bul jaǵdaı Syrdarııa ózeniniń joǵarǵy aǵysyndaǵy turaqsyz sý sharýashylyǵy jaǵdaıymen baılanysty.

- «Qazsýshar» RMK Túrkistan fılıalynyń qaramaǵyndaǵy «Dostyq» kanaly Jetisaı aýdanyndaǵy 84,3 myń gektar sýarmaly jerdi qamtıdy. Sý tek shart jasasqan sharýashylyqtarǵa beriledi.

2024 jylǵy kóktemnen beri elimizdiń ońtústigindegi bes oblystyń sharýalaryna 5,35 mlrd tekshe metrden astam sýarmaly sý jetkizildi. Onyń ishinde Túrkistan oblysyna — 1,79 mlrd tekshe metr, - delingen aqparatta.

Derekte bıylǵy sýarý kezeńi 20 kúnge erte bastalǵany jazylǵan. Joǵary aýa temperatýrasynyń áserinen vegetatsııalyq kezeń erte jyljyp, nátıjesinde Jetisaı aýdanynda 50 myń gektar alqapta sor shaıý jumystary júrgizilip, oǵan 125,7 mln tekshe metr sý jumsaldy.

Sýarmaly sýdyń erte berilýiniń arqasynda Túrkistan oblysynyń sharýalary:

• sáýirdiń ortasynda – qyryqqabattyń,

• mamyr aıynyń sońynda – qaýyn men qarbyzdyń,

• maýsym aıynda – baıaldy (baklajan) óniminiń alǵashqy legin jınap úlgerdi.

Mınıstrlik qazirgi sý berý jumystary josparly ári turaqty túrde júrip jatqanyn, tapshylyq týraly jalǵan aqparattar el ishindegi jaǵdaıdy burmalap kórsetýge baǵyttalǵanyn atap ótti.

Aıta keteıik, Jetisaı aýdanynda sýarý sýyn paıdalaný erejesin buzǵan 65 derek anyqtaldy.