Jetpis úsh jastaǵy aqsaqal Qazaqstannan Túrkııaǵa jaıaý bardy
Qazaqstandyq saıahatshy túrik astanasyna jetpes buryn birneshe memleketti jaıaý kesip ótip, myńdaǵan shaqyrymdy artqa tastaǵan, dep habarlaıdy QazAqparattyń menshikti tilshisi.
Qazaqstandyq aqsaqal Sársenbaı Qotyrashev úsh memlekettiń aýmaǵyn jaıaý júrip ótti. Ol Reseı men Grýzııa arqyly túrik eline jetý maqsatynda Qazaqstannan 2 tamyzda shyqqan.
Jolaýshy — qarapaıym ata. Biraq ony «qarapaıym» dep ataýǵa kelmeıtin tárizdi. 73 jasta ekenine qaramastan, essiz áreketter isteýge kúsh-jigeri tolyp tur.
Aqsaqal álemdi óz kózimen kórip, zertteýdi, saıahattap, Otanyn tanytýdy burynnan armandaǵan eken.
Jaıaý júrýdi jaqsy kóretin aqsaqal osylaısha 2 aı ishinde Túrkııaǵa jetip, ańyzǵa aınalǵan, tarıhı Ystambulda saparyn aıaqtaıdy.
Álemdi jaıaý aralaý týraly oı Sársenbaı Qotyrashevqa 7 jyl buryn kelgen. Biraq ony oryndaý múmkindigi bıyl ǵana buıyrdy. Bir jyl buryn Sársenbaı ata Qazaqstandy aralap shyqqan.
Elimizdiń 17 oblysy men Altaıdy kesip, 8 000 shaqyrym jol júrdi.
Onyń saıahattaýdaǵy maqsaty — álem qoǵamyn beıbitshilik pen dostyqqa shaqyrý. Ol jol boıy kezdesken adamdarǵa Qazaqstan, qazaq tili men halqymyz týraly aıtady.
Sonymen qatar Sársenbaı ata adamdarǵa qazaq halqynyń qundylyqtary men mádenıetin nasıhattap, tarıhı faktilerdi bólisip, qazirgi, zamanaýı Qazaqstan týraly áńgimelep beredi.
Aqsaqaldyń sózinshe, saıahattaýǵa eshqashan kesh emes, sol sebepti ornyńnan turyp, jolǵa shyǵý kerek.
— Adam densaýlyǵyn jaqsartqysy kelse — kúnine, keminde 7 shaqyrym jaıaý júrý qajet. Men sóıtemin jáne ol úshin sportshy bolý mindetti emes, — deıdi saıahatshy.
Sársenbaı atanyń sózinshe, onyń bala kezinde sportpen shuǵyldaný múmkindigi bolmaǵan. Ol qarapaıym jumysshylar otbasynda óskendikten, ákesiniń tabysy balasyn sport sektsııalaryna berýge jetpegen.
Ákesi — Uly Otan soǵysy ardageri, anasy — eńbek ardageri. Ózi bes balanyń úlkeni.
Qazir saıahatshy bolǵan ata jas kezinde ata-anasyna kómektesýge májbúr bolyp, óndiris ornynda jumys istegen. Bul jumys oǵan minezin shyńdap, densaýlyǵyn nyǵaıtýǵa kómektesti.
Tańǵalarlyǵy — jolda ol bir ret te aýyryp ne ózin jaısyz sezinbegen.
— Men túrli dárigerlerden birneshe ret medıtsınalyq tekseristen óttim, olardyń bári meniń fızıkalyq formam tamasha ekenin, óz jasym úshin densaýlyǵym óte jaqsy ekenin aıtady. Allaǵa shúkir, densaýlyǵymda kinárat joq. Qan qysymym áli kúnge deıin 120×80, — dep atap ótti ol.
Óziniń jaıaý saparlaryn Sársenbaı ata 3 kezeńge bólgen. Birinshi kezeń — Qazaqstan boıynsha saıahat boldy. Ekinshi kezeń aıasynda ol úsh elge — Reseı, Grýzııa men Túrkııaǵa saparlady.
Bul joly ol Jezqazǵannan Astanaǵa, ary qaraı Atyraýǵa bardy. Odan keıin Reseıge, Grýzııaǵa tabanyn tıgizip, Túrkııaǵa jetti.
Túrikterdiń astanasyn kórgennen keıin Stambulǵa jetip, sol jaqta «jaıaý serýenin» aıaqtap, elge qaıtýdy josparlap otyr.
Sársenbaı ata saparynyń Túrkııada aıaqtalýy da beker emes. Uzaq jolyn ol Qazaqstan men Túrkııanyń baýyrlastyǵyna, sondaı-aq 3 qazanda atalyp ótetin Túrkitildes elderdiń yntymaqtastyǵy kúnine arnaıdy.
— Jıhan kezý óte qyzyq. Ol úshin maǵan kóp nárse qajet emes. Men ózimmen shabadan men joldorbamdy ǵana alyp, eń qajet zattardy salamyn. Máselen, shabadanymda uıyqtaýǵa arnalǵan kórpe qap, aýa raıyna qaraı kıim-keshek pen jaýyn ótkizbeıtin shekpen bar. Sonymen qatar arbama qajet qosalqy bólshekter men keı qural-saımandy salyp aldym. Jolǵa kóp tamaq almaımyn, ystyqta ol tez buzylyp ketýi múmkin. Joldorbama belgili bir qashyqta jep úlgeretin tamaqty salamyn. Bul joly maǵan ózim qazirge deıin jumys isteıtin zaýyt pen bizdiń Geografııalyq qoǵam qarjylaı kómektesti. Jalpy jolǵa ózimniń jıǵan aqsham men zeınetaqyma shyqtym, — dep tájirıbesin bólisti saıahatshy.
Úshinshi kezeńdi Sársenbaı ata kelesi jyly júzege asyrýdy josparlap otyr. Ol 9 eldi jaıaý sharlap, Eýropaǵa barmaq.
