Jetinshi arnada saılaýaldy teledebattarǵa qatysýshylardyń sóz sóıleý reti anyqtaldy
ASTANA. KAZINFORM — Jetinshi arnada saılaýaldy televızııalyq debattarǵa qatysýshylardyń sóz sóıleý kezegin anyqtaıtyn jerebe tartý rásimi ótti.
Búgin Jetinshi arnanyń tikeleı efırinde 5 tamyz kúni Astanadaǵy «Qazmedıa ortalyǵy» kontsert zalynda ótetin saılaýaldy televızııalyq debattarǵa qatysatyn saıası partııalar ókilderiniń sóz sóıleý kezegin anyqtaıtyn ashyq jerebe tartý rásimi ótti.
Jerebe tartýǵa Quryltaı saılaýyna qatysatyn jeti saıası partııanyń ókilderi qatysty. Rásim ashyq formatta uıymdastyrylyp, barlyq qatysýshylar úshin teń múmkindik pen úderistiń ashyqtyǵyn qamtamasyz etti.
Jerebe tartý rásimin ótkizý úshin ishinde rettik nómirler jazylǵan kartochkalar salynǵan arnaıy ydys paıdalanyldy. Júrgizýshi partııalardy kezekpen atap, ár partııanyń ókili nómir jazylǵan kartochkany ózi tańdady. Jerebe nátıjeleri elektrondyq júıede tirkelip, ekranda naqty ýaqyt rejıminde kórsetilip otyrdy.
Jerebe tartý qorytyndysy boıynsha televızııalyq debat barysynda saıası partııalar ókilderiniń sóz sóıleý reti belgilendi:
1. Respublica partııasy — Meıramgúl Mádáli;
2. «Aq jol» partııasy — Dýlat Tastekeı;
3. Jalpyulttyq sotsıal-demokratııalyq partııasy — Maksut Nasıbýlov;
4. «Ádilet» partııasy — Raýan Kenjehanuly;
5. «Baıtaq» partııasy — Aslan Baızahanov;
6. «Aýyl» partııasy — Shahmardan Baımanov;
7. Qazaqstannyń Halyq partııasy — Beıbit Qusaıynov;
Esterińizge sala keteıik, televızııalyq debattar 5 tamyz kúni saǵat 20:26–da Jetinshi arnanyń tikeleı efırinde ótedi. Debattardyń negizgi taqyryby — bilim berý júıesin damytý. Joba ınteraktıvti formatta ótedi jáne tórt kezeńnen turady: partııalardyń saılaýaldy baǵdarlamalaryn tanystyrý, bilim berý salasyndaǵy bastamalardy talqylaý, stýdııa kórermenderiniń suraqtaryna jaýap berý jáne saılaýshylarǵa qorytyndy úndeý jasaý.
Jobanyń basty erekshelikteriniń biri — kórermenderdiń belsendi qatysýy. Tikeleı efır barysynda QR-kod arqyly onlaın daýys berý uıymdastyrylyp, onyń aralyq nátıjesi ekinshi kezeńde jáne qorytyndysy sońynda jarııalanady. Sonymen qatar kórermender arnanyń resmı Instagram paraqshasynda pikir qaldyra alady, olardyń bir bóligi tikeleı efır barysynda ekranda naqty ýaqyt rejıminde kórsetiledi.
Teledebattyń tikeleı translıatsııasyn Jetinshi arnanyń efırinen, sondaı-aq arnanyń resmı saıty men áleýmettik jelilerdegi resmı paraqshalarynan kórýge bolady.
