«Jetinshi arnada» saılaýaldy teledebattyń aralyq daýys berý nátıjesi jarııalandy
ASTANA. KAZINFORM — Astanada Quryltaı saılaýyna qatysatyn saıası partııalar ókilderiniń qatysýymen ótip jatqan televızııalyq saılaýaldy debat jalǵasyp jatyr. Onda onlaın daýys berýdiń aralyq qorytyndylary jarııalandy.
Jobanyń tikeleı efırde «Jetinshi arna» kórsetip jatyr.
Qazirgi ýaqytqa deıin qatysýshylar ózderiniń saılaýaldy baǵdarlamalaryn tanystyryp, bilim berý júıesin damytýǵa qatysty bastamalaryn usyndy. Qazir debattardyń kelesi kezeńinde saıası partııa ókilderi bir-birine suraq qoıyp, saılaýaldy baǵdarlamalardaǵy basymdyqtar, olardy iske asyrý tetikteri jáne memlekettik saıasattyń ózekti máseleleri boıynsha pikir almasyp jatyr.
«Ádilet» partııasynyń ókili Raýan Kenjehanuly bilim berý júıesin tsıfrlandyrýǵa baǵyttalǵan bastamalardy tanystyrdy. Partııa bilim berý salasynda jasandy ıntellektini qoldanýdy keńeıtýdi usynyp, jeke derekterdi qorǵaýǵa, tsıfrlyq qaýipsizdikti qamtamasyz etýge jáne halyqtyń tsıfrlyq saýattylyǵyn arttyrýǵa basymdyq beretinin málimdedi. Sonymen qatar aldaǵy bes jyl ishinde 5 mıllıon qazaqstandyqty tsıfrlyq tehnologııalar men jasandy ıntellekt daǵdylaryna oqytý jospary usynyldy.
Respublica partııasynyń ókili Meıramgúl Mádáli joǵary bilim berý júıesin damytý jáne onyń halyqaralyq básekege qabilettiligin arttyrýǵa baǵyttalǵan usynystaryn tanystyrdy. Partııa sheteldik talapkerlerge arnalǵan tsıfrlyq qabyldaý júıesin engizýdi, qos dıplomdy baǵdarlamalardy keńeıtýdi, bilim eksportyn damytýdy, táýelsiz akkredıtteý júıesin jetildirýdi jáne joǵary oqý oryndarynyń akademııalyq erkindigin keńeıtýdi usyndy.
JSDP ókili Maqsýt Nasıbýlov joǵary bilimniń qoljetimdiligin arttyrýdy qoldaıtynyn aıtty. Onyń pikirinshe, joǵary oqý oryndarynda tegin bilim berý popýlıstik shara emes jáne mundaı tájirıbe Eýropanyń birqatar elinde sátti júzege asyrylyp keledi. Partııa joǵary bilim alý múmkindigi otbasynyń qarjylyq jaǵdaıyna ǵana táýeldi bolmaýy tıis dep esepteıdi.
«Baıtaq» partııasynyń ókili Aslan Baızahanov ekologııalyq mádenıetti erte jastan qalyptastyrýdyń mańyzdylyǵyna toqtaldy. Onyń aıtýynsha, ekologııalyq aǵartý jumystary balabaqshadan bastap memlekettik basqarý júıesine deıin úzdiksiz júrgizilýi qajet. Sondaı-aq partııa osy ýaqytqa deıin 150 myńnan astam adamdy qamtyǵan ekologııalyq saýattylyq baǵdarlamalaryn júzege asyrǵanyn atap ótti.
Qazaqstannyń Halyq partııasynyń ókili Beıbit Qusaıynov kolledjderdi beıindi jeke kompanııalardyń senimgerlik basqarýyna berýdi usyndy. Partııanyń pikirinshe, bul tásil stýdentterdiń oqý barysynda óndiristik tájirıbeden ótýine jáne oqý aıaqtalǵannan keıin mamandyǵy boıynsha jumysqa ornalasýyna múmkindik berip, bilikti jumysshy kadrlardyń tapshylyǵyn azaıtýǵa yqpal etedi.
«Aýyl» partııasynyń ókili Shahmardan Baımanov «Dıplommen — aýylǵa» baǵdarlamasynyń oryndalýyn baqylaýdy kúsheıtýdi usyndy. Partııa baǵdarlamanyń iske asyrylýyn qadaǵalaý tetikterin jetildirý qajet dep sanaıdy. Sonymen qatar aýyldyq kvota arqyly joǵary oqý oryndaryna túsken túlekter oqýyn aıaqtaǵannan keıin týǵan aýyldaryna baryp eńbek etýi tıis degen ustanymyn bildirdi.
«Aq jol» partııasynyń ókili Dýlat Tastekeı pedagogterdiń eńbek jaǵdaıyn jaqsartý jáne jalaqysyn arttyrý qajettigine nazar aýdardy. Sondaı-aq partııa áleýmettik saıasatty jetildirýge jáne bilim berý júıesin damytýǵa baǵyttalǵan zańnamalyq bastamalardy júıeli túrde usynyp kele jatqanyn atap ótti.
Jobanyń basty erekshelikteriniń biri — kórermenderdiń belsendi qatysýy. Tikeleı efır barysynda QR-kod arqyly onlaın daýys berý jalǵasýda. Kórermender «„Qaı partııa ókiliniń sózi ótimdi?“ degen suraqqa jaýap berip, óz tańdaýyn jasaýda.
Alǵashqy kezeńderdiń qorytyndysy boıynsha onlaın daýys berýdiń aralyq nátıjeleri jarııalandy.
Onlaın daýys berýdiń aralyq nátıjeleri:
1. «Ádilet» partııasy — 42,53%;
2. JSDP — 9,57%;
3. «Baıtaq» partııasy — 1,32%;
4. Qazaqstannyń Halyq partııasy — 10,13%;
5. «Aýyl» partııasy — 17,58%;
6. «Aq jol» partııasy — 7,22%;
7. Respublica partııasy — 10,88%;
8. «Eshqaısysyn qoldamaımyn» — 0,77%.
Onlaın daýys berý tikeleı efır aıaqtalǵanǵa deıin jalǵasady.
Eske salaıyq, «Jetinshi arna» efırinde Quryltaı saılaýyna qatysatyn Qazaqstandaǵy jeti saıası partııa ókilderiniń teledebaty ótip jatyr.
