Jetimderge tezek pen qurt-qumyrsqa jegizgen: Qaraǵandyda 6 bala asyrap alǵan otbasyna qatysty sot júrip jatyr
QARAǴANDY. KAZINFORM – Qaraǵandyda alty balany asyrap alyp, birneshe jyl boıy qorlaǵan qamqorshylarǵa qatysty is boıynsha sot jalǵasyp jatyr. Otyrys barysynda qatygezdik áreketteri týraly birneshe derek anyqtaldy.
Qaraǵandy oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda prokýror jetim balalardy patronatqa alyp, olardy qorlaǵan otbasyna qatysty qozǵalǵan qylmystyq is boıynsha aıyptaý aktisin oqydy.
Atalǵan is boıynsha otaǵasy, onyń jubaıy jáne olardyń úlken qyzyna aıyp taǵylyp otyr.
Tergeý materıaldaryna sáıkes, olar patronatqa alynǵan alty balany uryp, qorlaǵany anyqtalǵan. Kishigirim shalys bassa, sottalýshylar balalardy qolǵa túsken nársemen urǵan.
— Aıyptalýshy I. kámeletke tolmaǵan balany kún saıyn azaptaǵan, ıaǵnı túrli zattarmen: oqtaýmen jáne kóseýmen sabaǵan. Balalardy ishinen, denesinen jáne basynan urǵan. Aýyr jumys isteýge májbúrlegen. Sál baǵynbasa, denesine zaqym keltirgen: kilemge orap, oqtaýmen urǵan. Balanyń ústine sekirip, psıhıkalyq azap keltirgen. Sabaqtan keıin dalaǵa shyǵarmaı, olardy dárethanaǵa ǵana jiberip otyrǵan. Balalar daladaǵy dárethanaǵa tez júgirip, dereý qaıta oralýlary kerek bolǵan. Olardyń tamaqtanýǵa, áleýmettik beıimdelýge degen qajettiligin elemegen. Baqshadaǵy jumystardy istegende tezek arasynan shyqqan qurttar men jándikterdi jeýge májbúrlegen. Túnde aýlaǵa qýyp shyǵyp, ıttiń kúrkesinde túneýge májbúrlegen. Basqa bólmede bólek tamaqtandyryp, olarǵa etsiz buqtyrylǵan makaron ǵana bergen. Al óziniń týǵan balalaryn tolyqqandy tamaqtandyrǵan. Onyń ústine, tamaqtaný kezinde balalardyń tamaǵyna janýarlardyń nájisin qosyp, olardy jeýge májbúrlegen, — dep prokýror Medeý Jaqanov aıyptaý aktisin oqydy.
Qujatqa sáıkes, bul áreketterge tolyqtaı otbasy qosylǵan. Ákesi, anasy jáne úlken qyzy asyrap alǵan balalardy qatty uryp-soqqan. Saraptama qorytyndysy boıynsha balalardyń denesinde soqqynyń izderi anyqtalǵan. Tek bir ǵana balanyń basynda 47 tyrtyq bolǵan. Alaıda, olar buryn salynǵan soqqy bolǵandyqtan, jaraqat qashan alynǵanyn dál anyqtaý múmkin emes. Biraq balalar bul jaralardyń bárin asyrap alǵan otbasy músheleri qaldyrǵanyn biraýyzdan moıyndap otyr.
Qazir balalardyń bir bóligi jetimder úıinde. Bir úıdiń úsh balasy ájesiniń qolyna kóshken. Aǵaıyndy balalardy týǵan ájesi birneshe jyl boıy asyrap ala almaǵanyn aıtady. Sebebi nemereleri burynǵy kelinniń atyna jazylǵan, sondyqtan tegi de basqa bolǵan. Alaıda balalardyń ákesi qaıtys bolǵan soń, ájesi zańgerlerge júginip, qamqorshylyq qujattaryn rásimdegen. Balalardyń anasy balalardy kúıeýimen ajyrasqannan keıin jetimder úıine tapsyryp jibergen. Sol jerden balalardy sottalyp jatqan osy otbasy asyrap alǵan.
— Qazir balalardyń jaǵdaıy jaqsy. Biraq olarda ádet pen úreı qalyp qoıǵan. Balalardy qaıta tárbıeleýge týra keledi. Nemerelerime eshteńe úıretpegen. Tek baqshada jumys istetip, maldyń sońyna salyp qoıǵan. Olar tańerteń jýynyp, tósek jınaýdy da bilmeıdi. As úıge eshqashan kirip kórmegen. Maǵan olardy qaıta tárbıeleý ońaıǵa soǵyp jatqan joq. Bul qylmyskerler nemerelerimniń balalyq shaǵyn urlady. Olardy ábden azaptady. Úlken nemeremniń betin qaınaǵan sýmen kúıdirgen. Tisterin tazalaǵanda olarǵa tis pastasyn túkirtpeı, jutýǵa májbúrlegen. Endi pastany kórgende júrekteri aınıdy. Baqshada jumys istegende balalarǵa qurttar men jándikterdi jeýge májbúrlegen. Muny búkil otbasymen jasaǵan. Balalar ábden qorqyp qalǵan. Qazir jaılap úırenip keledi. Biraq qushaqtaıyn desek birden bastaryn jaýyp qorqa bastaıdy, — deıdi úsh balanyń ájesi.
Eske salaıyq, Qaraǵandyda Qarqaraly aýdanynda alty balany asyrap alyp, birneshe jyl qorlaǵan otbasy múshelerine qatysty sot qaralyp jatyr.