Jetim jáne ata-ana qamqorlyǵynsyz qalǵan balalardy qorǵaý tetikteri kúsheıtildi
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine mádenıet, bilim berý, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Zańǵa qol qoıdy, dep habarlaıdy Aqordanyń baspasóz qyzmeti.
Atalǵan Zań arqyly Jer, Bıýdjet, Kásipkerlik, «Neke (erli-zaıyptylyq) jáne otbasy týraly», «Halyq densaýlyǵy jáne densaýlyq saqtaý júıesi týraly» kodeksterge, sondaı-aq «Qazaqstan Respýblıkasyndaǵy til týraly», «Qazaqstan Respýblıkasyndaǵy bala quqyqtary týraly», «Mádenıet týraly», «Bilim týraly» jáne «Pedagog mártebesi týraly» zańdarǵa ózgerister engizildi.
Túzetýlerdiń birinshi blogy jetim jáne ata-ana qamqorlyǵynsyz qalǵan balalardy qorǵaýdyń quqyqtyq tetikterin kúsheıtedi.
Balany asyrap alý jáne kámeletke tolmaǵandarǵa qamqorshylyqty nemese qorǵanshylyqty taǵaıyndaý barysynda balanyń týystaryna, al olar bolmaǵan jaǵdaıda nekede turǵan adamdarǵa basym quqyq beriledi.
Túzetýlerdiń ekinshi blogyna sáıkes, balalardyń tamaqtanýyna, turǵyn úıine, medıtsınalyq kómegine, bilim alýyna, tárbıesine jáne olardy saýyqtyrýǵa memleket bıýdjeti esebinen qarjy bólinetin sýbektilerge (obektilerge) qatysty memlekettiń sanıtarııalyq-epıdemıologııalyq baqylaý men qadaǵalaý tártibi «Halyq densaýlyǵy jáne densaýlyq saqtaý júıesi týraly» Kodekstiń, sondaı-aq «Qazaqstan Respýblıkasyndaǵy bala quqyqtary týraly» Zańnyń aıasynda retteletin salaǵa jatqyzylady. Sáıkesinshe tıisti normalar Kásipkerlik kodeksten alynyp tastalady.
Túzetýlerdiń úshinshi blogy bilim berý salasyndaǵy keıbir túıtkildi máselelerdi sheshedi.
Budan bylaı tehnıkalyq jáne kásiptik, orta bilimnen keıingi bilim berý uıymdary Oqý-aǵartý mınıstrligi bekitetin, osyndaı uıymdar qyzmetiniń jetistikterin reıtıngtik kórsetkishterge saı baǵalaý ádistemesine jáne olardy saralaý qaǵıdalaryna súıene otyryp saralanady. Al joǵary nemese joǵary oqý ornynan keıingi bilim berý uıymdarynyń saralanýy Ǵylym jáne joǵary bilim mınıstrligi bekitetin baǵalaý ádistemesi men qaǵıdalaryna negizdeledi.
Túzetýlerdiń tórtinshi blogy mádenıet salasyndaǵy birqatar máseleni sheshýge baǵyttalǵan.
Kontsert ótkizý kezinde fonogramma paıdalanýǵa tyıym salynady (Bul erejeniń televızııalyq jazbalarǵa, kontsert ótkizýge arnaıy beıimdelmegen jáne arnalmaǵan oryndarǵa qatysy joq). Sondaı-aq avtorlyq quqyq obektisi sanalatyn shyǵarmalardy mass-medıada nemese onlaın-platformalarda jarııa túrde paıdalanǵan kez kelgen jaǵdaıda avtordy (avtorlardy) kórsetý mindetti.
Kitaphana qoryn baıytý jáne saqtaý sharalaryn qabyldaý budan bylaı jergilikti atqarýshy organdardyń quzyretine kiredi.
Zań mátini baspasózde jarııalanady.
Osyǵan deıin jetimder men qamqorshysyz balalardy kásibı otbasylar tárbıeleıtini týraly jazdyq.