Jetim balalarǵa baspana berýdiń arnaıy baǵdarlamasy kerek - Gennadıı Shıpovskıh
ASTANA. KAZINFORM – Memleket turǵyn úı, bilim alý jáne jumysqa ornalasý kezinde jetim balalarǵa jetkilikti túrde qoldaý jasaı almaı keledi. Búgin Senattyń jalpy otyrysynda depýtat Gennadıı Shıpovskıh Úkimet basshysynyń atyna joldaǵan saýalynda osy problema týraly aıtty.
Senatordyń aıtýynsha, qoldanystaǵy memlekettik baǵdarlamaǵa qaramastan, jetimder men ata-anasynyń qamqorlyǵynsyz qalǵan balalar áli de kúrdeli máselelerden aryla qoıǵan joq. Jetim balalarǵa baspana alýǵa jeńildik qarastyrylǵan, alaıda statıstıka kórsetkendeı, kámeletke tolǵandardyń bárine birdeı baspana berile bermeıdi. 2022 jyly kezekte turǵan 61 471 jetimniń 852-si ǵana baspana aldy, al 2023 jyly 62 290 muqtaj adamnyń 809-y ǵana turǵyn úıge ıe boldy.
Depýtat kóptegen jetim oqý ornynan ketkennen keıin, bolashaq ómirin qalaı jalǵastyrý kerek ekenin bilmeıtinin atap ótti. Osyǵan baılanysty ol bilim alýǵa múmkindik berý úshin kolledjder men joǵary oqý oryndaryndaǵy jetim balalarǵa arnalǵan grantqa kvotany ulǵaıtýdy usyndy.
«Sheshýshi másele – jumyspen qamtýdyń sheshimin tabý bolmaq. Ókinishke qaraı, qazir orta mektepti bitirgen jetim balalardyń jumysqa ornalasý kórsetkishi kóńil kónshitpeıdi. Eńbek jáne halyqty áleýmettik qorǵaý mınıstrliginiń aqparatyna súıensek, bıyl mansap ortalyqtarynyń kvotasy aıasynda barlyǵy 4 275 adam jumysqa ornalasty, onyń 85-si ǵana jetimder. Jastar arasynda jumyspen qamtý sharalarymen 188 663 adam qamtylsa, onyń nebári 56-sy ǵana jetim balalar. Bul máseleni kóterý sebebim, ózim de ata-anadan erte aıyrylyp, balalar úıiniń tárbıesin kórdim jáne bul máselelerdi ishten bilemin desem artyq bolmas. Ondaǵy dostarymyzben osy kúnge deıin aralasyp turamyz. Onymen qosa, meniń atyma jetim azamattardan kóptegen ótinish kelip túsedi, olardyń basym bóligi joǵaryda aıtylǵandaı baspana alý men jumysqa ornalasýǵa qatysty», - dedi Gennadıı Shıpovskıh.
Depýtat Premer-Mınıstrge kámeletke tolǵan jetim balalarǵa turǵyn úıdi kútý merzimin qysqartatyn arnaıy baǵdarlama ázirleýdi, sondaı-aq oqýyn aıaqtaǵannan keıin olardy jumysqa ornalastyrý úshin derbes baǵdarlamany iske qosýdy usyndy.
Osyǵan deıin Jambylda sheneýnikterdiń kesirinen 156 jetim bala úı kezegine turmaǵany týraly jazdyq.
