Jetim balalardyń tálimgerleri psıhologııalyq daıarlyqtan ótedi
ASTANA. KAZINFORM – Bıylǵy jyldyń aqpan aıynda jetim balalar men ata-anasynyń qamqorlyǵynsyz qalǵan balalardyń tálimgerlerin oqytýdy mindetteıtin zańǵa qol qoıyldy.
Oqytýdy tálimgerlik jónindegi uıymdar jeke qarajaty esebinen júrgizedi. 2024 jyly Qazaqstanda jetim balalar men ata-anasynyń qamqorlyǵynsyz qalǵan balalarǵa qoldaý kórsetýge baǵyttalǵan tálimgerlik ınstıtýty engizilgen bolatyn. Atalǵan mehanızm bilim berý uıymdarynyń tárbıelenýshilerin 10 jastan bastap óz betinshe ómir súrýge daıyndaýǵa múmkindik beredi.
Tálimgerlerdi daıarlaý ata-anasynyń qamqorlyǵynsyz qalǵan balalarǵa sapaly qoldaý men kómek kórsetýde mańyzdy qadam. Biz bul shara balalardy áleýmettendirýge jáne óz betinshe ómir súrýge daıyndaýǵa yqpal etetin tálimgerliktiń tıimdi júıesin qurýǵa múmkindik beretinine senimdimiz, - dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Tálimger bolýǵa elimizdiń kámelet jasyna tolǵan jáne qorǵanshylarǵa qoıylatyn talaptarǵa sáıkes keletin azamattary úmitker bola alady. Mindetti oqytýdan ótkennen keıin tálimgerlerge biliktiligin rastaıtyn sertıfıkat beriledi. Odan keıin tálimger, qorǵanshylyq jáne qamqorshylyq organy, sondaı-aq bilim berý uıymy arasynda resmı kelisim jasalady. Aldaǵy ýaqytta tálimgerlik júıesi qıyn ómirlik jaǵdaıǵa tap bolǵan balalardy qoldaý júıesiniń mańyzdy bóligine aınalady. Bul olardyń qoǵamǵa qıyndyqsyz beıimdelýine jáne bolashaqta ómirden óz ornyn tabýyna septigin tıgizedi.
Eske salsaq jetim balalarǵa memleket bergen páterdi jekeshelendirý quqyǵy berilgeni týraly jazǵan bolatynbyz.