Jetilik zańdylyǵy: jady men jasandy ıntellekt arasynda baılanys bar ma
ASTANA. KAZINFORM – Reseı men Ulybrıtanııanyń zertteýshileri jadynyń matematıkalyq modelin jasap, onyń kómegimen tiri jaratylystarǵa, sondaı-aq robottar men jasandy ıntellekt júıelerine arnalǵan túısikterdiń (sezim músheleriniń) ońtaıly sanyn eseptep shyǵardy, dep jazdy TASS agenttigi.
Esepteýler kórsetkendeı, mundaı sensorlardyń (túısikterdiń) ońtaıly jıyntyǵy bes emes, jeti jeke sezimdi qamtıdy, dep málimdedi «Skoltehtiń» baspasóz qyzmeti.
— Adam jadynda saqtalatyn jeke uǵymnyń sany kóp bolǵan jaǵdaı — árqaısysyna jeti, bes nemese segiz emes, dál jeti belgi sáıkes keledi. Adamnyń sezim múshelerine qatysty bul qorytyndyny tym baıyppen qabyldaýdyń qajeti joq, biraq robototehnıka men jasandy ıntellekt teorııasynda bul paıdaly bolýy múmkin, — dedi Skolteh jasandy ıntellekt ortalyǵynyń professory Nıkolaı Brıllıantov, onyń sózin oqý ornynyń baspasóz qyzmeti keltirgen.
Ǵalymdardyń aıtýynsha, olardy kópten beri adamnyń jáne basqa tiri jaratylys jadynyń negizgi birlikteri — engrammalar qalaı qurylǵany jáne mıdaǵy qaı bólikter olardy qaıta jańǵyrtýǵa jaýapty ekeni qyzyqtyryp keledi. Dástúrli túrde engrammalar — birqatar belgilermen sıpattalatyn ıdealdy abstraktili obekti retinde qarastyrylady. Mysaly, «banan» uǵymy — bul jemistiń vızýaldy beınesi, ıisi, dámi jáne sezim múshelerinen alynǵan basqa da aqparatpen baılanysty.
Mamandardy kópten beri engrammalar qalaı qalyptasady jáne syrtqy álemnen keletin túrli áserler nátıjesinde qalaı ózgeredi degen suraq alańdatyp keledi. Bul — aqparat pen uǵymdardy meńgerý jáne umytý mehanızmderin zertteý úshin mańyzdy. Osy protsesterdi zertteý úshin ǵalymdar jadtyń matematıkalyq modelin jasap, túrli jaǵdaılarda engrammalardyń kúıiniń qalaı ózgeretinin baqylady.
Zertteýshilerdiń aıtýynsha, jeti sany kontseptýaldy keńistiktiń erekshelikterine jáne sezimdik áserlerdi týdyratyn syrtqy stımýldarǵa táýelsiz túrde anyqtalady. Ǵalymdardyń pikirinshe, bul san — jadydaǵy engrammalardyń senimdi jáne turaqty sıpattamasy bolyp tabylady, sondyqtan ol avtonomdy robottar men adamnyń jadysyna uqsas júıeleri bar jasandy ıntellektterdi ázirleý kezinde eskerilgeni jón.
Aıta keteıik, Qazaqstanda jasandy ıntellekt jáne tsıfrlyq damý mınıstrligi qurylady.
