Jetisýlyqtar qazaq óneriniń abyzy Asanáli Áshimovpen júzdesti
ASTANA. QazAqparat - Taldyqorǵandaǵy І. Jansúgirov atyndaǵy Mádenıet saraıynda Eńbek Eri, KSRO jáne Qazaqstannyń Halyq ártisi, teatr jáne kıno akteri, rejısser Asanáli Áshimovpen kezdesý ótti.
Kezdesý «Rýhanı jańǵyrý» baǵdarlamasyna oraı elimizdiń aıtýly tulǵalarymen, mádenıet jáne óner qaıratkerlerimen ótkiziletin «Jetisýdaǵy júzdesý» jobasynyń aıasynda uıymdastyryldy, - dep habarlaıdy Almaty oblysy ákiminiń baspasóz qyzmeti.
Bıyl óner tarlany Asanáli Áshimov 80 jasqa toldy. Osy mereıtoı aıasynda oblys basshylyǵy jetisýlyqtarmen kezdesýge A. Áshimovti arnaıy shaqyryp, qurmet kórsetti.
Aldymen 80 jyldyq mereıtoıǵa arnap túsirilgen «Syr tunǵan aısberg» atty derekti fılm kórsetildi. Fılmde akterdiń ómiri men shyǵarmashylyǵy qatar órilip berilgen. Ómirdiń san qıly belesteri, qıyndyqtary men qyzyǵy, úmit pen senim, qajyr men qaırat - júrip ótken baspaldaqtarynyń barlyǵy da kórermenniń kóz aldynan tizbektele ótti.
Munan soń kópshiliktiń ystyq yqylas, qol shapalaqtaýymen sahnaǵa kóterilgen Asanáli Áshimov jetisýlyq qaýymǵa rızashylyǵyn bildirip, ómir týraly, óner týraly ishki tolǵamdarymen bólisti. Sahnaǵa shyqqan akterdiń jary Baǵdat, qyzy Saǵına men uly Asanáli de aty ańyzǵa aınalǵan talant ıesiniń qamqor otaǵasy, ardaqty áke retindegi bolmysyna sóz arnady.
Oblys ákimi Amandyq Batalov óziniń Almaty qalasynda qurylys salasynda eńbek etip, «Qazaqfılm» kınostýdııasyn turǵyzǵan kezdegi Asanáli Áshimovpen alǵash kezdesken sátterinen estelik aıtty.
«Sizdi qazaq teatr jáne kıno óneriniń metri dep maqtanyshpen aıtamyz. Jetisý jurtshylyǵynyń sizge degen yqylasy bólek. Qaıtalanbas qoltańbańyzdy baǵamdaý, ónerdegi baspaldaqtaryńyz, ómirlik tájirıbeńiz qoǵam úshin, keıingi jas býyn úshin asa qajet. Sondyqtan mundaı kezdesýlerdiń mańyzy zor dep esepteımin. Qazaq ónerine qyzmet ete berińiz. Jasyńyz júzge jetsin!» - dedi A. Batalov.
Munan soń abyz aqsaqaldyń ıyǵyna shapan jaýyp, syı-sııapat kórsetti.
Kezdesý sońynda jurtshylyq Asanáli aqsaqalmen emin-erkin tildesip, qoltańba alyp, estelikke sýretke tústi.
